كم معلومه تخص السمنه و النحافه عند الاطفال :
1. إلى عمر ١٢ سنه ماكو اي ادويه للرجيم او الحميه مرخصه
الموضوع يحتاج صبر و صبر كبير
2. العلب المشبوهه و بعض انواع الاعشاب اللي تستخدم لزياده الوزن أكثرها محتوياتها كورتزون اللي تجي مع طن من الاعراض الجانبيه
اكيد ما اقصد الادويه اللي موجوده بالصيدليات
بس ببعض الصفحات المشبوهه بالفيس بوك و غيره
3. اي طفل ياكل من أوسط ما ياكله الشعب العراقي ما يحتاج اي فيتامينات و لا مقويات عدا فيتامين د المهم و الضروري و بالأخص الرضع
4. موضوع السمنه يبدي مبكرا
من عمر سنتين
بس تلاحظ الطفل بدا يصعد وزنه من هالعمر المبكر
اي من عمر سنتين
5. رحله تصعيد الوزن و الترشيق تحتاج الى جهد و وقت طويل
6. الفيتامينات ما تعوض عن الأكل و لا تسد عنه
7. نقص الحديد مهم ويبدي مبكرا
و بهذا الخصوص نذكر بالاساسيات
اللحم أغنى مصدر للحديد
و اللحم يدخل للاطفال مبكرا بحدود ٤ إلى ٦ أشهر
الحليب بيه كالسيوم و الكالسيوم يعارض امتصاص الحديد
8. الحليب مو غذاء كامل و لا يسد احتياج الطفل من كل شيء بعد عمر ٦ اشهر
و بعد عمر ٦ أشهر لا يأخذ الطفل اكثر من ١٦ إلى ٢٠ رقم باليوم
و بعد السنه ما ياخذ اكثر من ١٢ رقم
9. الفطور اي وجبه ضروريه
بس اذا عرفتوا توكلون جهالكم الفطور
يا ريت تكولولي طريقه لان جهالي ما يفطرون و يرحون لدوامهم بلا فطور
الاكل للاطفال يبدأ ليلا
و السبب ؟
هرمون النمو يفرز ليلا
10. نبدي صح
كلش صح
مو شاي و بسكت
و لا كومه حلويات
لا نبدي بالاطعم المعتدله و الخضراوات و الفواكه و البقوليات
12. اسوء المشتريات من السوق هي العصير يجي بعدها الجبس و بعدها الجيلاتين
بس يبقى العصير هو الأسوء
فهو بلا اي قيمه غذائيه و هو فعلا مي و شكر
13. للاطفال اللي عمرهم أكبر من سنتين و يشربون حليب اكثر من مرتين ادعوك انت الأم او انت الاب ان تشرب نفس الكميه من الحليب اللي يشربها طفلك حتى تعرف شون الحليب يسد الشهيه
14. بعد عمر السنه اذا لاحظت ان الحليب يسد الشهيه أجله ليلا قبل النوم و مره باليوم
15. الطفل اللي ما يحب الحليب عادي بدله باللبن
16. المشتريات مره او مرتين بالشهر
ما تكدر ؟
اوكي مره بالاسبوع
و المشتريات تناولها يكون عصرا
17. اكل بين الوجبات لازم يكون صحي قدر الإمكان
مثلا بوشار مصنوع بالبيت
او كيك بالحبوب
18. الاندومي مره او مرتين بالشهر اوكي
٤ مرات بالشهر هم اوكي
بس باضافه بعض الأشياء اللي تزيد قيمته الغذائيه
19. لا تقطع تماما
اقطع تدريجي حتى لا يحس الطفل باللي صار
كنت تشتريله ب ٥٠٠ دينار يوميا
اشتريله ب ٢٥٠ دينار يوميا
وراها كل يومين
20. عمر المناعه و الصحه ما تجي بعلب
المناعه تجي بنوم وفير و اكل صحي و اكل خالي من السكريات و رضاعه طبيعيه و نظافه شخصيه
د. سيف سمير البياتي اخصائي طب الاطفال
from د. سيف سمير البياتي