لهذا السبب عليك ان تنتظر !! 😔
يصدف أحيانا ان نعمل على الانعاش القلبي الرئوي لمريض متوقف قلبه و تنفسه فإذا بيد تمتد الى جسدك لتنبهك
انا : تفضل ؟ ومستمر بعمل الانعاش القلبي الرئوي
هو : دكتور بلكت تمشيني مستعجل
انا : !!!!!😒
—
اكو ناس متعرف شنو طوارئ، الطوارئ هي مكان الحالات الطارئة
الطوارئ للمنتول والمسوي حادث والمجلوط
الطوارئ للإنسان الي اذا ما عالجته يموت، 😓😓
بالله عليكم، شفت واحد راسه يوجعه من الفلاونزا ومات؟ 😏😏
شفت واحد جاي يجيك ضغطه ومات لان ما قاسووله ضغط؟
اكيد لا، الاولوية بالطوارئ للمرضى التعبانين والي باين هالشي على اشكالهم، هذولي غالبا تلكيهم كبار بالسن واكفين بالسرة ساكتين مينطقون كلمة، الطبيب لمن يشوف مريض يصيح و يهوس ويدافع عن سراه، ياخذ نظره عن هالمريض انه حالته مو حيل تعبانة لان بيه حيل يدافع عن سراه ويعارك
بس المريض الساكت، هذا قنبلة موقوتة
وياما وياما مرضى ساكتين واكفين بالسرة و الطبيب انتبه لصمتهم واخذهم بيده بالتالي طلعوا مجلوطين او بيهم شي خطر ! 🤷
رسالتنا البسيطة الي نريد نوصلها
اذا صارلك اسبوع مريض وحالتك بسيطة مراح تسببلك الموت، لا تزاحم الحالات الطارئة
الحجي الي اخذت سراه علمود ترجع للبيت بسرعة ومات بسببك
باجر ممكن يكون ابوك اسم الله على عمره ويجي واحد ياخذ سراه !!
انتظر سراك، اترك الأطباء يقومون بشغلهم، الحالات الطارئة أولا
الحالات الباردة مكانها الاستشارية مو الطوارئ
الي تشوفوه بالصورة
جهد الكوادر الطبية والصحية لانقاذ مريض واحد وهالهوسة كلها تمت بدقائق لان الدقيقة كلش مهمة
اذا تأخرت ربع ساعة وحالتك مو طارئة، مراح تموت والله
بس المجلوط اذا تأخر ربع ساعة، خلايا اكثر من خلايا قلبه تموت للابد، وممكن يوكف قلبه اصلا
—
د سلمان داود
مقيم اقدم اطفال
حساب التوعية على الانستاغرام
https://instagram.com/dr_salmand?igshid=qbd41hnknyb3
from د. سيف سمير البياتي