#متلازمة_تشرين
او #متلازمة_شهر_11
او #متلازمة_نوفمبر
كل سنه من سنين طويلة الاحظ زياده مو طبيعيه بعدد المرضى من الاطفال
و بكل الأمراض
اسهال
انفلونزا
التهاب قصيبات
التهابات الحنجره
و التهاب اذن وسطى
حرفيا كل أنواع الالتهابات
تشوف الطفل يتمرض يوم او اثنين و بعد ما يطيب يرجع ثاني يوم يتمرض
الموضوع مو مقتصر على ما اشاهده من خلال العياده
بالبيت الاولاد كذلك
حسن مثلا صار ٣ مرات يصير بيه نشله و انفلونزا بس خلال هذا الشهر على الرغم من أخذه لقاح الانفلونزا
اغلب الاطفال هيجي يصير وياهم
يوم يومين يطيبون و يرجعون وراها يتمرضون و يطيبون و لما تعدي هذه الاشهر اللي تبدي بشهر تشرين الثاني نكون تعبنا اني و الاطفال
هل الموضوع صحيح؟
لو مجرد مشاهده طبيب ؟
أتصور الموضوع صحيح لأن غير زملاء عدهم نفس الملاحظه
نجي نفصلها وحده وحده
اول وحده
💔حالات الاسهال و القيء مع ارتفاع الحراره و اللي دائما يصير بعد ما يجيكم خطار عدهم طفل بيه اسهال او تاكلون اكل ملوث من مطاعم غير نظيفه او جبس مخزون بصوره رديئه
💔 ثاني مرض هو مرض التهاب اللوزتين المتقرح
💔 ثالث مرض هو فايروس اسمه herpangina متكرر و يسوي حراره عاليه و قرح فمويه
💔 فايروس الفم و القدم و اليد منتشر كذلك بهذه الفتره
💔 ما يستثني هذا الفايروس الرضع فيصيبهم بفايروس مسؤول عن التهاب القصيبات
💔 اما اطفال المدارس فبين كورونا او الانفلونزا و تكون حرارتهم عاليه و سعالهم شديد
🌷 السبب الثاني
هو التحسس الربوي و الربو و نوبات التحسس الناتجه عن اختلاف درجات الحراره
و حساسيه الأنف اللي تزدهر بهذا الموسم
كل هذه خلت شهر ال ١١ شهر مشهور بكل انواع الأمراض
خلينا نحمي اطفالنا و نكول
اول حل
اذا مو ضروريه الروضه او الحضانه فنقلل عدد مرات اللي يروحون بيها اطفالنا للروضة
خصوصا لاطفال التحسس و الربو
بس اذا كان و لا بد
هاهيه
طبعا اكيد الروضه مفيده و تعليميه و مهمه بعد عمر السنتين بس اذا تلاحظ انه الطفل تكثر جدا امراضه بهذه الفتره فقيس الأمور بمقياسك و شوف شنو الانسب
الاستمرار بالروضة او تركها لهذا الشهر و الشتاء القادم
هذه ظروفك انت اعرف بيها
ثانيا
التعقيم مهم
و فتح النوافذ و الأبواب و التهويه مو رفاهيه
و التعرض للشمس ضروري جدا
ثالثا
توصيه الأمهات انه ما ترسل طفلها للحضانه اذا الطفل مريض
صح المرض ممكن يعدي قبل ما تظهر الاعراض بس نقلل العدوى
رابعا
فيتامين دي
خامسا
أكبر محفز للمناعه هو الاكل الصحي البعيد عن السكريات و الدهون و النوم و الكثير من النوم
سادسا
مضادات التحسس مهمه و نبدي بيها و نحضر البخاخ ( النبيولازر)
سابعا
ابتعد عن المدخن و التدخين
د. سيف سمير البياتي اخصائي طب الاطفال
from د. سيف سمير البياتي