من اجل طفل سليم جسديا وذهنيا
طلعتي حامل تبدين تنظمين امور الطفل ونظام حياته من اول يوم يطلع التحليل ايجابي❤️
انام شوكت ما اكدر وشكد ما جسمي يطلب احاول قدر الامكان 🤷🏽♀️
ما اكدر اكل ونفسي تلعب اول ٣ اشهر طبيعي وماكو مشكلة اهم شي منصير فقر دم وجفاف
اخذ فولك اسد
اكل فواكه وخضراوات اذا اكدر
اشرب يوميا كوب حليب او لبن
مي يوميا ٢الى٣ لتر عالاقل بعد انتهاء الوحام ما الكم عذر بعدها😬
اكل لحوم عالمستطاع ما اكدر ما احبهم ما اكدر يوميا اذا اعوض عالاقل الحديد من مصادر نباتية مثل الشوندر السبيناغ التمر العدس الراشي
الاوميغا مفيد بس مو الزامي
علاج التقلصات غالبا هو بروجسترون اذا كنتي محتاجته مو قانون للكل
لومينال حبة بيضة صغيرة لاتاخذيها رجاء متفيد للتقلصات ومالها اي داعي
بيوتادين حبوب دوفيلان حبوب انلغت من زمان لعلاج التقلصات
ابرة الرئة مو قانون
نقلل الكافيين قدر المستطاع يأثر عالجهاز العصبي للجنين ممكن كوب قهوة او بيبسي او شاي واحد باليوم
تدخين يقطع يقطع يقطع لان يسبب ضمور
النمو وانفصال المشيمة والتخثر والجلطة الدموية تزيد جدا احتماليتها للحامل وتدخن
مشي وحركة طبيعية بس لاجهد فوق المعتاد يعني اروح اصير سوبر ومن واشيل زولية لو اغير الديكور مال البيت
بس الحركة العادية جدا مقبولة وبالعكس نشجع عليها ترة النوم بالفراش طول النهار يسوي ركود بالدم ويزيد احتمالية الولادة المبكرة
مو كل وجع او تشنج اسفل البطن علامة لشئ مرضي ممكن شد بالاربطة الي يم الرحم وهذي متخوف وواردة جدا بالحمل حبة بندول تهديها
وجهي تعبان من الحمل بشرتي تعبانه مرطبات بسيطة وخفيفة واذا احتاجيتي شي اكثر رجاء استشارة لطبيب الجلدية لان كثير من الكريمات بيها رتنول وهذا يسوي تشوهات ممنوع بالحمل نهائي
اذا كان الحمل بعد فترة من العقم اكيد هذا حمل عزيز عليج وعلينه بس كثرة القلق مو زينة عليج خلي الامور طبيعية حتى تمشي طبيعية
الي اول حمل لتقرر نوع الولادة لما تدخل بشهرها وتزور طبيبتها وتاخذ وقتها بالقرار بعد التوصيات والفحص
انت دتسوين اروع واحلى انجاز بالحياة دتكبرين جنين وتنمين روح بداخلج اقري اسمعي اشياء مفيدة اخذي وقتج وافتخري بنفسج هذا اعظم اعجاز في الحياة
ادمتم بخير
معكم دائما طبيبة النسائية والتوليد من صفحتي وصفحة الدكتور سيف سمير البياتي
د رحاب مجيد شريف😊
from د. سيف سمير البياتي