نرجع للاساسيات
اساسيات النوم الامن للطفل
حسب اخر مقال منشور عن الجمعيه الامريكيه لطب الاطفال
الهدف من النوم الامن هو تقليل متلازمه موت المهد اللي يروح ضحيتها 3500 طفل سنويا بامريكا
لذلك نؤكد على التالي :
1. النوم الامن لغايه عمر سنه هو على الظهر حتى الاطفال اللي عدهم ارتجاع مريئي
2. فراش الطفل لازم يكون مشدود جيدا و مو لين بحيث يغطس بيه الطفل
3. ينام وياك بنفس الغرفه بس مو بنفس السرير لغايه ٦ اشهر على الاقل و الافضل لعمر سنة
4. ابدا لا تجيبين طفلك لفراشك الا لرضاعه او تخليه بحضنك فراشك مو لنوم طفلك
5. ممنوع ممنوع ممنوع نوم الطفل على القنفه او حافه الكرسي او اي مكان اخر
و هنا امهاتنا اللي وكعوا اطفالهم من القنفات راح يتذكرون جيدا هذه النقطه
6. ابعد كل الاشياء الناعمه و اللي ممكن يختنق بيها بعيدا عن طفلك مثل الوساده او اللعابات و البطانيات
و هنا راح نعترض و نكول شون بلا مخده و الجواب يكون ان الطفل ما يحتاج مخده لغايه عمر سنه
7. لاباس ابدا من تقميط الطفل بس بشرط ان لا يكون ضيقا و ان لا يشمل الفخذين حتى لا يزيد خطر الاصابه بالخلع الولادي
8. لاباس من وضع الملهيه بفم الطفل عند الاغفاءات فشافوا بدراسه انه الملهيه تقلل متلازمه موت المهد
و هذه نقطه ثانيه للملهيه ممكن نستفاد منها اذ تقلل المغص
بس لا ننسى اذا ترضعين طبيعي لا تدخليها قبل الشهر
و مع السلامه ملهيه بعمر ٦ اشهر
9. لا تدخنين قبل الولاده اي لا تدخنين بفتره الحمل و ابعدي المدخن عن غرفه طفلك قبل ولادته
10. رضعي طبيعي فالرضاعه الطبيعيه تحمي طفلك من متلازمه موت المهد اكثر من الرضاعة الصناعيه
11. التزمي باللقاحات و مواعيد الزياره لطبيبك
12. ابدا لا تنسين وقت وضع الطفل على بطنه بس بشرط طفلك كاعد و انت كاعده حتى لا يصير راس الطفل مسطح
تحديث هذا المقال بتاريخ ٢ تشرين الثاني ٢٠٢٠
د. سيف سمير البياتي اخصائي طب الاطفال
