هذا البوست هو الثالث بخصوص سوالف ما تتصدك
هذا بوست خطير و يحتاج جرأه لقرائته
هل ممكن نكرر الخطا؟
يعني اهل خطئوا تجاه طفل هل ممكن يكررون الخطا ثاني مع نفس الطفل او اخ الطفل ؟
راح اسرد 3 قصص شوف عين !
⭕ يوم من الايام حضرت للطواريء شابه عمرها 15 سنة في حاله يرثى لها و السبب؟
الطفله مشخصه بالسكر و اهلها يرفضون اعطاؤها الانسولين بحجه تتعود عليه
الطفله باقيه على اعشاب و حرفيا و فعليا بدون اكل بيه نشويات !
وصلت فاقده الوعي و بحاله وذمه دماغيه
خلال ساعات توفت الى رحمه الله
السنة اللي بعدها تشخص اخوها بالسكر و اهله للمره الثانيه كانوا رافضين اعطاء الانسولين للمره الثانيه حتى لا يتعود عليه !!!
تخيلوا !!
الطفل ادخل المستشفى و الحمد لله عاش بفضل الانسولين
الانسولين حياه
الانسولين و البخاخ و غيره ما يتعود عليه
بس راحوا منه اطفال و شباب بسبب هذه الفكره المغلوطه كثيييير
⭕ طفل داخل للمستشفى بسبب عجز كليه حاد ناتج عن الاسهال و معالج بالسكوه ( مجموعه اعشاب تعطى لحالات الاسهال)
هذه السكوه تسبب عجز كلوي حاد
و هذا اللي صار
الطفل صار بيه عجز كليه حاد
بس الاسهال ما توقف
بعدها دخل الطفل مستشفى
لتسالني الام ليلا
دكتور يصير انطيه سكوه لان ما صار زين الاسهال و عندي بعد سكوه !!!
تخيلوا
⭕ طفله حبوبه لطيفه عمرها 4 ايام عدها ارتفاع بابو صفار شديد و اكيد كلاده الثوم تلمع و منتظرين الثوم يشتغل و ماخرين الطفله
الطفله سويتلها تبديل دم بعد محاولات و محاولات و محاولات لاقناع اب الطفل بضروره تبديل الدم لحمايه الطفل
ليش هي القصه هنا؟
الطفله عدها اخ صاير بيه تلف بالدماغ نتيجه ابو صفار و هم منتظرين الثوم يشتغل !!
هذه قصص من واقعنا
قصص من مرضى اني تعاملت وياهم
قصص حزينه من حاضرنا العراقي المليء بالاضافه للحروب و الانفجارات مليء بالجهل و التخلف و زواج القاصرات و زواج اللي ما متحمل مسؤوليه نفسه و زواج اللي يكولون زوجوه هسه يعقل و بالتالي خراب الاطفال و صحتهم
نهاركم سعيد
د. سيف سمير البياتي اخصائي طب الاطفال
