هو ليش الطفل لازك بيه و ما يخليني اتحرك ؟
السؤال المقدمه قبل ما تدخل الام حليب صناعي
شوفي الطفل اللي يرضع طبيعي زين لازم ينام او يكون مرتاح تقريبا ثلاثه ارباع الساعه الى الساعتين بدون ما يطلب رضاعه
اللي دا يصير في اغلب الحالات ان الطفل يمسك بشفافه الحلمة و يشفط هوا و الام تتصور دا ترضع و ظهرها مكسور و تتخيل دا ترضع بس الطفل دا يشفط هوا و شويه حليب
شويه و يضوج و يتركها وراها خطيه ما شبعان الطفل يرجع يبجي و يريد يرضع
تتدخل جده الطفل و تكول حليبج ما يكفي دخلي حليب صناعي
و تدخل حليب صناعي و كلها كم يوم و يتعود على الرضاعه الصناعيه و يترك حليبها و يحول على حليب البقر
هذا الخطا بالالتقام و عدم اخذ الثدي اتمنى تنتبهوله و موجوده بوستات عن كيفيه الرضاعة الطبيعيه بالصفحه
.
.
اكو شغله اخرى اريد تنتبهولها
اسمها طفرات النمو
هو ان النمو يصير سريع بيها
و تصير باعمار ثابته
اسبوعين الى ٣ اسابيع
6 اسابيع
3 اشهر
6 اشهر
هنا النمو يزيد و يحتاج اكيد الى رضعات اكثر و هذا تفسره الكثير من الامهات انه الحليب ما يكفي في حين المطلوب انه تخلين طفلك على صدرك اكثر
حتى طفلك ينطي اشعار للثدي بزياده الانتاج
و راح يزداد الانتاج
.
اعطاء الحليب الصناعي كمساعد هو بدايه النهايه للرضاعه الطبيعيه و الاحساس اللي ما يشبهه احساس بالعالم كله
.
اعطاء الحليب الصناعي راح ينطي اشعار انه طفلك ما محتاج للحليب فيقل انتاج الحليب
فقط استمري
و تابعي الوزن ويه طبيبك
د. سيف سمير البياتي اخصائي طب الاطفال
