وحده من اساسيات خلق طفل متعلم
هو اداء الواجبات المنزليه
و هذه تبدون بيها من عمر مبكر
عمر سنتين و اكثر
راح اكتب لكل عمر المقترحات و انتوا ابدعوا
هذا الشي راح يعلمه يكون اكثر تعاونا اقل انانيه اكثر تحملا للواجبات منذ الصغر
🙃من عمر سنتين الى ٣ سنوات
اهم وحده يلم ملاعيبه
يرتب الكتب
يمسح اللي وكع من الحليب مالته او العصير مالته ( ولو ما افضل تنطون عصير للاطفال )
تفريغ طاوله الطعام
يساعدك بحمل بعض المواد من ترجع من السوق
ياخذ المهملات للسله
يساعدك بترتيب الملابس من تكمل من الغساله
🙄بعمر ٤ الى ٦ سنوات
يرتب فراشه
يطعم حيوانه المفضل اذا مربين حيوان
خلي يتعلم ياخذ الاكل و يكعد ياكل لوحده اذا كانت وجبه بين الوجبات الرئيسيه
سقي النباتات
☺بعمر ٧ الى ٩ سنين
يستيقظ وحده على صوت المنبه
يحضر كتبه
و يحضر اكل المدرسه
و يتصرف بمصروفه اليومي
ممكن يشغل الغساله
و اكيد اذا يعرف يطبخ اكله بسيطه فليش لا
و يعرف يستخدم المكنسه الكهربائيه و ينظف غرفته
مسح الارضيات
❤بعمر ١٠ سنين و اكثر
هنا يصلح بعض التصليحات البسيطه ممكن
و ينطي رايه بالمصروف المنزلي
يطبخ وجبه كامله
و يغسل السياره
هذه بعض المهام المقترحه
و اكيد على حسب ما يفهمه الطفل
و احسن طريقه حتى يطيعك و ينفذ هو انه تشاركه التجربه
يعني مو اكوله يلا تعال رتب او سوي
كوله تعال نرتب فراشك
او نشيل العابك
و هو شويه شويه لما يشوفك كاعد تشتغل وياه راح يشاركك مره بعد مره
تذكر جيدا
نهدف لطفل متعاون غير مغرور
د. سيف سمير البياتي
اخصائي طب الاطفال
