و قبل ما تولدين و انت بالاشهر الاخيره من الحمل لازم تعرفين ال 22 شغلة اللي جايه :
1. الرضاعه بأول ساعه صحه و مناعه
الرضاعه بأول ساعه اذا وضعك و وضع الطفل يسمح
فانطيه رضاعه طبيعيه
فهذا اول لقاح لطفلك
طبعا سواء ولدتي قيصريه او طبيعي رضعي طبيعي
ماكو اي داعي لتاجيل الرضاعه
دامك تقدرين سويها و رضعي
هذا هو تعب ال ٩ أشهر و هذه الهديه الأولى لطفلك
2. الكثير و الكثير و الكثير من الجلد على الجلد
اشوف الكثير من الأمهات يكولن ما رضع طبيعي و رفض الرضاعه
امي خلي جلده على جلدك و راح ياخذ الرضعه
احضنيه بلا ملابسه
و خلي جلدك يلامس جلده
3. اعرفي ان الطفل اللي يرضع طبيعي راح يسوي خروج كل شويه و هذا يدل على جوده حليبك
و حتى الصناعي ممكن كذلك
أحيانا تغيير بسيط بنوعيه اكلك راح تغير الموضوع
4. اعرفي انه من الطبيعي ان ينزل وزن طفلك
تقريبا ١٠ بالميه من وزنه راح ينزل و بعدين يرجع لوزن الولاده
لذلك عادي ينزل الوزن
و هذا ما يدل على عدم كفايه الحليب
5. ابدا لا تفارقين طفلك الا بإشراف بالغ
ممكن جدا يتقيء طفلك و يختنق
بس بوجود البالغ راح يعرف شون يتصرف
عندي بوست عن الاسعافات الاوليه راح اخليه بالتعليقات
6. المغص قادم
تحضري له
بس اعرفي انه سيتحسن بعدين
القطرات الامينه متعدده بس أكثرها أمانا قطرات السيمثكون و قطرات الكوليف
7. تحضري لطفح الحفاظات
فممكن استخدام كريم للحفاظ أساسه الزنك
8. تأكدي من النوم الأمن اللي هو على الظهر
بس تأكدي من تقليب الراس حتى لا يصير راسه مربع
9. ديري بالك من الهز العنيف
فالهز العنيف قد يؤدي الى متلازمه شديده و نزف بالدماغ
10. اخذي حذرك من متلازمه موت المهد
و التحضيرات لمنع هذه المتلازمه راح انزلها ببوست بالتعليقات
11. ديري بالك لا يوكع
النقطه اللي تكولين صدك جذب شيوكعه
بس اؤكدلك انه اني أسبوعيا اشوف طفل واكع من ايد امه او ايد ابوه او ايد الجده
12. حمايه الجلد مهمه و مهمه جدا
و استخدمي كريم مرطب كثيرا
و لا تكثرين غسل صيفا او شتاءا
13. اغلب الحبوب اللي تطلع بوجه الطفل اول اشهر طبيعيه
و بالأخص اللي تشبه حب الشباب
14. الاكزيما
الكثير من الاطفال بشرتهم رقيقه فيكونون عرضه للاكزيما
كل اللي عليك هو الترطيب
15. تقشر الجلد طبيعي و لا يحتاج إلا المزيد من الترطيب
16. الشعر اللي طلع على طفلك راح يوكع عادي ماكو مشكله
17. البقعه الرخوه على رأس طفلك طبيعيه و تختلف بالحجم من طفل لآخر و ما تحتاج شي و لا تخافين منها بس لا تضغطيها زياد
18. قبعه المهد طبيعيه و ما تحتاج شي
قبعه المهد هي طبقه القشره السميكه على رأس طفلك
اذا ضايجه منها ادهنيها بزيت جوز الهند مو زيت الزيتون
و اذا عندك فلوس اكو مرهم خاص بهذا الموضوع من الصيدليات
19. فدوه لعينك رتبي نومته من اول يوم حتى تعيشين مرتاحه بعدين
البوست عن ترتيب النوم بالتعليقات
20. مو كل بجي يعني الطفل جوعان
الطفل يبجي لان بردان او حران او جوعان او شبعان او ممغوص او مشتاقلك او ضايج
مو كلشي يعني جوعان
21. الرجفه اللي تصير بالطفل مو معناها بردان ابدا و هي شي طبيعي جدا
22. اخر نقطه
العطسه شي جيد و علامه جيده و تدل على نضوج الجهاز العصبي
د. سيف سمير البياتي اخصائي طب الاطفال
from د. سيف سمير البياتي