يوم من الايام
سألت بنتي الكبيره انت سعيده؟
جاوبت بعناد المراهقه المعتاد لا
تدخل احد اخر و كال ليش مو سعيده منو مثلك كلشي متوفرلك و كلشي عندك و شتردين ابوك و امك يجيبون لك
سكتت الطفله و سكتنا
و ضميت الموضوع بداخلي فهل ما نراه انه يسعدنا راح يسعد اطفالنا؟
الجواب هو اكيد لا
تعامل ويه مشاعر طفلك كلها
لا تقنعه انه انت سعيد او تجبره على الإحساس بالسعاده
و طرحت الموضوع ثاني يوم
و نفس الجواب كان لا مو سعيده
و أخذنا و انطينا و تبادلنا وجهات النظر
و اقتربت منها و تعاملت ويه حزنها و مخاوفها و غضبها
استغليتها فرصه للتقارب بيننا
ما قلته واضح صح ؟
خلينا نوضح اكثر
يوم من الايام رجعت من دوامك و كان يوم سيء و رجعت للبيت و كلت لزوجك او زوجتك اووووف شون يوم مزعج
شريكك اذا كالك يمعود قابل شكو شراح يصير
انت ما راح تحس ابدا بالتعاطف و لا راح ترغب بالحديث
و مره ع مره تكبر الفجوه و ما راح يعجبك تحجي اي شي يخصك
بس لو كالك ها شكو خير شصاير
راح تحس انه فعلا متعاطف و مهتم
تذكر دائما أن شعور الالم او الغضب او الغيره اذا عبر عنه طفلك احتويه افتهمه و لا تسخفه
اذا يغار من اخته تقبل جوابه لا تجبره يحب اخوه او اخته بس تقبل مشاعره
اذا ضايج من طلعه افتهم منه مو تكوله ليش مو تونست و لعبت بس اقترب منه أكثر و افتهم منه
د. سيف سمير البياتي اخصائي طب الاطفال
from د. سيف سمير البياتي