١٠ اشاعات حول الرضاعه الطبيعيه
١. الرضاعه الطبيعيه سهله !!!
الموضوع نظريا صحيح بس لما تصير واقع التشققات و انسداد القنوات و قله الانتاج و الحلمه الغائره مشاكل حقيقيه تحتاج الى الصبر و الايمان و الكثير من الخبرات
٢. الرضاعه الطبيعيه مؤلمه !!!
عمر الرضاعه الطبيعيه ما كانت مؤلمه
ممكن يكون وياها بعض الانزعاج باول ايام
بس بعد ايام من الرضاعه و الاستمرار بيها راح يروح هذا الانزعاج
استمري فقط
هذا الوقت سيمضي
٣. لازم تغسلين الثدي قبل كل رضاعه !!!
ماكو ابدا هيجي موضوع
الغسل للثدي مرتين باليوم
و ما يحتاج ابدا الموضوع الى المبالغه
٤. لازم الام تاكل فاهي او تاكل فقط الاكلات اللي ما بيها طعم !!!
فعلا اكو اكلات تعبر الى الطفل و تسوي عنده مغص او غازات بس مو كل طفل يتاثر بيها و مو كل الاكلات
ببساطه من يصير عند طفلك مغص
راجعي قائمه الطعام
٥. ما تكدرين ترجعين طفلك للرضاعه الطبيعيه اذا ما رضع منك باول يوم او يومين !!!
على ارض الواقع هذا غير صحيح ابدا
و اعرف الكثير الكثير من الامهات اللي اولادهم دخلوا خدج ٢٠ يوم او ٣٠ يوم و بدوا بعدها رضاعه طبيعيه
مالك غير الصبر و المتابعه
و منزل بوست قريبا على موضوع اختلاط الحلمه
٦. ما يصير ترضعين اذا كنت مريضه !!!!
اكبر خطا و اكبر ضرر يصير اذا ما رضعتي و انت مريضه بامراض بسيطه مثل التهاب اللوزتين او السعال و الرشح لان جسمك راح ينتج اجسام مضاده تساعد طفلك على مقاومه المرض
٧. ما يصير تاخذين اي علاج دامك ترضعين طبيعي !
خطا خطا خطا
اكثر انواع الادويه يصير تاخذيها و من اشهرها مضادات الالتهاب و علاج السعال و الرشح و حبوب الغده الدرقيه
٨. الاطفال اللي يرضعون طبيعي يصيرون ملتصقين بامهم !!!
مو قانون ابدا هالشي ممكن يصير اللي يرضع صناعي هيجي و ممكن طفلك هيجي
كل طفل و طبيعته
مالها اي علاقه الرضاعه الطبيعيه بالموضوع
٩. صعب الفطام من الرضاعه الطبيعيه اذا قررت افطم بعمر سنه !!!
ابدا الموضوع هو نفسه سواء رضعتي طبيعي او صناعي اطمئني و استمري بالرضاعه الطبيعيه و افطمي ويه ما تخلص اجازه الامومه و الفطام فقط يحتاج الى عزيمه و ماله علاقه الموضوع بنوعيه الرضاعه سواء طبيعي او صناعي
مو تنسين مع السلامه مميه بعمر سنه
١٠. من مقهوره ما يصير ترضعين طبيعي !
اعترفلك انه ممكن يتغير طعم الحليب و يصير شويه حامض اذا تنقهرين
بس هذا ما يمنع انه ترضعين استمري فقط
اصلا الرضاعه هي اللي راح ترفع معنوياتك و تزيد هرمون الحب الاوكستوسين
استمري فقط
و انت شنو سمعتي اشاعه بخصوص الحليب الطبيعي
شاركينا بيها
د. سيف سمير البياتي
اخصائي طب الأطفال
خليك مستمره
انت الصح
