شلون أعرف مانع الحمل الافضل الي؟
هواية تجيني هيج اسئلة وحقيقة جوابها يختلف من امرأة لاخرى 🙏🏼 وكل طريقة بيها فوائد وبيها مضار ..شلون؟
الطريقة الابسط والاكثر استعمال هي المانع الطبيعي الي هوايه يمشون عليه هذي الطريقة مابيها ادوية وراسج بارد معدتج زينه سمنه ماكو بس هي اكثر الطرق بنسبة الفشل يعني الحمل عليها هوايه يصير وندخل بزاوية ياريتني وياريتك😬
حبوب منع الحمل ❤️❤️
اشكال وانواع ما ادوخكم وكومة انسأل عنها هذا زين؟ذاك احسن؟
عزيزتي كل شخص يرهمله شي يعني الياسمين رهم لصديقتج او اختج مو شرط يرهملج😅
الي هستوها متزوجة وطالبة مثلا او متريد فد سنة تصير حامل شنو تستعمل؟ طبيعي او حب مانع👍🏻🙀
اي حب المانع الناس كلش ظالمته اكثر مادة مابيها تاثير بعيد المدى عالمبيض هو حب المانع من تعوفي بمعدل٣ الى ٦ اشهر ترجع الاباضة عدا اذا عندج خلل اخر يأخر الحمل🤰🏻
هذي الحبوب ترهم تقريبا لاغلب النساءبعمر١٨-٣٥ وحتى لل٤٠ بس وراها ندير بالنه شوية
الي عدها ضغط عالي مو ضغط بسيط ومسيطرة عليه لا الي ضغطها عالي سكرها عالي عدها لاسامح الله صرع او عجز بالكبد او الكلية متستعمل الحبوب طبعا هاي باختصار لان عدنه قائمة طويلة من الممنوعين من الحبوب😵💫
بس اذا انتي عندج سمنه وعندج مشكلة صحية مزمنة لتاخذين حب مانع لطفا🙏🏼
المشكلة بالحبوب الالتزام اليومي🗓🗓🗓
اذا من النوع الي تنسين لتورطين روحج بالحبوب او نزلي تطبيق بالتلفون مال حبوب المانع تنطيج الاوقات وتنبهج🤠📲
اللولب النحاسي هواية يسالون عليه🌸🌸🌸
اني شخصيا كطبيبة اشجعكم عليه ليش؟ لان متظلين تفكرين ولازم يومية تاخذين حب هو مانع طويل المدى بس يزيد كمية الدورة وهاي تنحل بالعلاج البسيط
الهرموني مو للكل يفضل هو يرهم لاغلب المريضات بس ارلا سعره ٤٠٠ الى٥٠٠ دولار ثانيا بي هرمونات يعني ممكن تحسين بانتفاخ وممكن تنزل قطرات من الدم كل فتره بس اكو حالات معينه يفيدهم هيج مجموعة من المريضات تحدد الامور الهم من طبيبة النسائية والتوليد
اللولب الهرموني والنحاسي اجسام غريبة ودنحطهم يعني طبيعي اول اسبوع الى اسبوعين اعراض التهاب والم ممكن تحدث وبعدين تمشي الامور لهالسبب روتين ننطي مضادات حيوية ومسكنات من نخلي لولب
أبرة منع الحمل💉
اولا كل ٣ اشهر ماكو شي تنطي مناعة تره بس لان هي توكف شغل المبايض ممكن يتاخر الحمل مرات للسنتين
طبعا تزيد الوزن بمعدل٣ كيلوات بالسنة😵💫
ما افضلها ل الي عدهم طفل او طفلين وممكملين العائلة لان كومة يجون وراها امورهم متخربطة وبس نريد نرجع الامور😕
تفيد الى عمرها فوك٤٥ غالبا
عقد الانابيب طريقة نهائية ومابيها رجعة ومابيها ذيج الاعراض الجانبية مو مثل قبل ٢٠ سنة هسه الطرق الجديدة حلوة وتخلي المريضة مشرقة ومرتاحة🥰
شريحة منع الحمل
تفيد ٣ سنوات بس هم هرمون ممكن يخربط الدورة بس يبقى يشتغل ك مانع
حطو ببالكم ماكو مانع ماكو مانع مابي نسبة فشل كلها بيها حتى عقد الانابيب بيها تره بس اقل من غيرها
اختيار المانع مو انتي تحددي لازم والافضل الج ولعائلتج طبيبتج تحدده 🙏🏼
منع الحمل طريقة صحيحة لتنظيم حياتج وحياة العائلة اختيارج الصحيح ينعكس عالبيت كله❤️
.
.
.
د رحاب مجيد
https://www.facebook.com/Dr.Rihabmajeed
from د. سيف سمير البياتي