بدا الشتا او توا بدا و بدينا نلف الاطفال بميه لفه و ميه شال و ميه بطانيه
تعالوا نحجي علم بخصوص كثر التغطيه
كلنا نخاف من ارتفاع الحراره للرضع و الاطفال
و كلنا ما نريد اطفالنا تتعرض للحراره العاليه
الحراره و كثر التغطيه تقلق الطفل و تخرب نومته و تسوي عنده طفح
مو بس هاي
كثر التغطيه مرتبطه بارتفاع الاصابه بمتلازمه موت المهد
و لذلك اقترحوا انه الغطاء يكون مثل الصوره حتى لا تسد مجرى التنفس
طيب شنو علامات انه اني مبالغ بتغطيه الطفل ؟
1. تحس الطفل حار من تلمسه
2. جلده احمر
3. عنده خفقان
4. تحس الطفل خامل و ما يستجيب
5. أحيانا يصير عنده قيء
6. تحس الطفل دايخ و مو بوعيه
طيب
شنو درجه الحراره اللي تناسب الطفل؟
مو كلنا عدنا محارير بالبيت
بس درجه الحراره المناسبه هي بين ٢٠ إلى ٢٤ درجه مئوية. او ببساطه تحس الجو مريح للأم و الاب
تذكر دائما الطفل اللي متدفي زايد يكون غير مرتاح دائما
لذلك بأبسط معادله الجو المناسب لطفلك هو الجو المناسب لك
و اللبس المناسب لطفلك هي نفس لبسك زائد قطعه اضافيه واحده لا اكثر
و لا تنسون ان القماط يعتبر لبس إضافي
الصورة من NHS بخصوص النوم الأمن للرضع
د. سيف سمير البياتي اخصائي طب الاطفال
from د. سيف سمير البياتي