اخر فصل من الحمل🤩🤩🤩
وصلتي للثلاثة أشهر الاخيرة بالحمل مبروك وصلتي للشوط الاخير شنو تسوين بي؟
⭐️حساب حركة الطفل
بهالفترة حساب الحركة بعد مهم ويحسب والام هي افضل واصدق احساس بحركة الطفل اذا قلت وكانت مو ضمن المعتاد بس مع ذلك ممكن متنتبهين الا بعد حدوث شي لاسامح الله ،طريقة الحساب للحركة هي كالتالي:
🌺اختاري وقت الطفل غالبا يتحرك بي هوايه اكو حوامل بعد الاكل مباشرة اكو بليل من تنام وترتاح اكو الفجر شوفي انت شنو وضعج بالوقت .
🌺سجلي عالاقل ببالج وقت تقريبي شكد استغرق الطفل حتى يتحرك عشر حركات يعني ساعتين ساعة حتى تنتبهين من تقل الحركة وهذا الوقت يوميا تابعي الحركة بي من تقل بشكل ملحوظراجعي طبيبتج .
⭐️ الي عدها اختلاف بفصيلة الدم بينها وبين الزوج فصيلة دمها سالبة يفضل ان تقوم باجراء تحليل indirect coombs test ك روتين واذا طلع سلبي المفروض ويفضل ان تأخذ جرعة اولية من ابرة اختلاف الدم anti D هذي ابرة التطابق اكو بيها هواية طرق للاستعمال افضلها هي الجرعة الوقائية بين٣٢-٣٤ اسبوع ثم بعد الولادة جرعة ثانية حسب فصيلة دم الطفل.
⭐️سونار ملون او مايعرف بالدوبلر غالبا تحتاجه المريضة الي تعاني من عدم كفاءة المشيمة او ارتفاع بضغط الدم او سكر الحمل او تاريخ طبي سابق لانفصال المشيمة او حجم الطفل صغير
يعني مو روتين اروح اسوي دوبلر ترة ميحتاج للكل 👌🏽
⭐️وبهالفترة نبدي نتابع ونقره او عالاقل عاليوتيوب عالفيس بوك انستا ممكن نتابع كروبات للحوامل وناخذ نصائح من ناس اختصاص مو من اي احد ونتعلم ونسال عن الرضاعة الطبيعية وفوائدها عن طرق العناية بالطفل باول ايامه ود سيف سمير ممقصر ويانه بالموضوع اني كأم فرقت تربيتي لاطفالي والعناية بيهم هواية من تابعته😊
⭐️نسأل عن المستشفى ونشوف قربها اذا بديت ولادة ونسال الطبيبة من الشهر السابع او الثامن عن مكان الولادة وتواجدها او اكو احد بديل حتى تكونين على دراية بوضعج👌🏽
⭐️شكد تخططين غالبا الخطط رح تتغير ويفاجأكم البيبي بس انت اذا كنتي من محبين التحضيرات والبيبي شاور وكذا ابدي حضريها من بداية الثامن واستمتعي بيها .
⭐️اللحظة الي اموت عليها 😃
شراء حاجات الطفل ملابس وادوات غسل وشامبوات واغطية وسرير 😍😍😍
تخبل بس انتبهي واسمعي مني ومن امهات قبلج
الطفل يكبر بسرعة اخذي اشياءقليلة طبعا اغراءات ملابسهم فظيعة😅 بس اغلبهم متلحكين تلبسيهم للبيبي لان يتغير حجمه بسرعة😃
اخذي سرير يفيدج لفترة طويلة حتى لتكثرين من الاغراض.
⭐️حتى اذا ماعندج مجال غرفة طفل عالاقل المكان الي رح تخلين السرير بي غلفي الجدار يمه بلون هادي وحلو وسوي ركن يخص البيبي ينطي احساس بخصوصية البيبي واذا كنت ام لاطفال قبله خليهم يشاركون وياج جدا رح يحبون الموضوع وتقوين الرابطة بينهم وبين الطفل الجاي❤️
⭐️صور صور صور حتى اذا سمنانة حتى اذا مورمة اخذي صور 😊
⭐️ابر الرئة مو روتين مثل مگلت سابقا
⭐️التغذية بهالفترة مهمة جدا نوعية مو كمية كثري من الخضراوت الفواكه اللحوم لان وزن الجنين يزيد بالثلاثة اشهر الاخير وبداية من ٣٢ اسبوع يعني ببداية الشهر الثامن يبدي يزيد بمعدل ربع كيلو بالاسبوع وهالشي مو قليل ابد
⭐️ببداية الشهر التاسع نزور الطبيبة ونحددموعد الفحص وتحديد نوع الولادة والمكان والزمان الي غالبا يتغيرون بس عالاقل نكون على دراية بالمسار مال الولادة ❤️
⭐️سوي الاشياء الي تحبيها حتى اذا محد يشاركج بيها استمتعي بكل ركلة للجنين بعدين رح يكبر الطفل وتتذكريها وتتذكرين انه من هو ببطنج وكح ويتحرك🤣
⭐️تحضيرات جنطة الولادة رح اسويلكم بوست عليها وحد🌺
انت محاربة ابد ابد لتقللين من قيمة تعبج بالحمل كوني فخورة بنفسج ❤️
د رحاب مجيد
https://www.facebook.com/Dr.Rihabmajeed
from د. سيف سمير البياتي