حقيبة الولادة
حقيبة الولادة كلكم تنتظروها 😁
اولا تشمل ٣ حقائب الثالثة اختيارية بس تحضريها افضل برأيي الشخصي
🌺حقيبة الام
اخذي اشياء تحتاجيها فعلا وتكون واسعة وحقيبة سفر صغيرة افضل وكلشي بيها واضح او تكون ملصقات صغيرة عالحافظات الي بداخل الحقيبة حتى المرافقة توصلهم بسهولة ومتدوخ 😬
❤️ملابس بيت دشداشة او بجامة واسعة وعددهم سيتين وتكون ذات ازرار او سحاب حتى تكون سهلة الاستخدام عند اول رضاعة للبيبي😍
❤️ملابس داخلية وحفاظات مابعد الولادة ويفضل تكون بكيس او حافظة قماش ومؤشرة او مكتوب عليها حتى تعرفها المرافقة
❤️سلبر خفيف ويكون واسع وسهل اللبس مو معقد وعالي وكراكش تتبلل من يدخلوج للحمام🌝
منشفة وحدة بسيطة وخفيفة واكو انواع استعمال واحد
❤️جواريب خفيفة زوجين
حافظة صغيرة بيها مرطب جسم او لوشن صغير وميكب اب بسيط ( اختياري) وكلينكس مرطب(wipes)ومشط وقراصة
❤️معطر جسم بسيط ومو قوي وعدم استعمال عطر قوي
❤️شامبو ومكيف وصابونة وغسول يد وكلها متوفرة ب احجام صغيرة حلوات وصغار وتحتاجيهم
❤️حجاب الاميرة او توربان او شيلة اضافية اذا كنتي محجبة 👌🏽
❤️ملابس الرجوع بالسلامة بعد الولادة سيت بسيط وسهل الاخذ بجنطة الولادة
👌🏽طبعا بالمستشفى رح تاخذين العلاجات اذا ولادة طبيعية او قيصرية بس مثل ما اوصي مريضاتي بالعيادة اوصيكم علاج مابعد العملية او بعد الولادة حضري قبل وكت وخلي وياج بالجنطة حتى لتدوخ المرافقة او زوجج بالصيدلية والعلاج وخصوصا اذا صارت الولادة ليلا والصيدليات مو كلها مفتحة 👌🏽واهمشي مسكن بعد الولادة كبسول او حقن 👌🏽
❤️سيت شرشف ووجه مخدة وغطوة خفيفة لان متوفرة بالمستشفى بس حتى تاخذين الشي الي يخصج
❤️شاحنة موبايل 🌝
❤️مشد بعد الولادة المشد الثلاثي وانصح بي للحركة الاسهل ومن ثاني يوم تستعملي جدا آمن ومريح 👌🏽
❤️الاهم من كل هذا الاهم الاهم 🙏🏼🙏🏼🙏🏼
مستمسكات تعريفية كاملة وجاهزة وكارت المراجعة او سوناراتج واخر تحاليل نسبة الدم او اوراق العلاج 👌🏽👌🏽👌🏽👌🏽
🌺حقيبة البيبي
تكون من النوع المعروف وحجمها تقريبا واحد وتكون خفيفة وسهلة الفتح
❤️تحتوي فانيلا داخلية للبيبي عدد٢ وسيت ملابس فضفاض وسهل اللبس وغطاء رأس وهوايه تكون موجودات اشكال حلوة وسيتات بس مو كل الي بالباكج رح تحتاجي👌🏽
❤️كماط عدد ٢ الاختيار حسب الموسم بالنسبة للنوع بس غالبا الافضل مو ثگيل وابد لتاخذين الصوف او المبطن مزعج بالجنطة ومزعج بالاستعمال
👌🏽بطانية طفل صغيرة
❤️حفاظات حديث الولادة
❤️شامبو الطفل والزيت او اللوشن اختياري وغالبا متحتاجيهم بالمستشفى
❤️طبعا نفضل الرضاعة الطبيعية
بس احتياط ناخذ ممة صغيرةعدد٢ وترمز مي صغير وغلاية اذا متكفي بجنطة البيبي خلي الغلاية بجنطة الماما
❤️منشفة صغيرة ومناديل صغيرة ومناديل مرطبة خاصة للبيبي
❤️بودرة الطفل عديمة الرائحة اختياري
❤️كريكوت البيبي الصغير لحمل الطفل عند الخروج بالسلامة ❤️
🌺الجنطة الثالثة للمرافقة او للزوج بيها سيت ملابس وملابس داخلية ومنشفة وصابونة وبس 😬
المهم اخذ اشياءقليلة وسهلة الحمل وسهل الوصول الها ولتكثرين بدون فائدة ابدا
👌🏽حضري الجنطة من بداية الشهر لان متترفين ب اي وقت ممكن تبدي ولادة او يصير شي طارئ و راح تنخبصون ومتلحكون تاخذون الاشياء المهمة
طبعا ممكن تضيفون اشياءاخرى بس الاغلب هو استعمال الاشياءالي ذكرتهم فقط 👌🏽
تكومون بالف سلامة ماميات انتو واطفالكم ❤️❤️❤️
د رحاب مجيد شريف
from د. سيف سمير البياتي