حوراء
طفله عراقيه عمرها سبع سنوات اغتصبها ذئب بشري عمره بالاربعين سنه
حوراء ضحيه مثل هوايه ضحايا بهذا المجتمع
ضحايا القسوه و الظلم و اللا انسانيه
حوراء ضحيه
مثل الاطفال اللي رمتهم امهم قبل فتره من جسر بأحد جسور بغداد
مثل طفل عمره حفنه سنين ابوه يعنفه و يضربه و يصوره قبل كم يوم
مو بعيد عن هذا الخبر و هذه الحادثه و تلك
نقلا عن وكاله الانباء العراقيه تم إلقاء القبض على 328 حدثا بتهمه الاتجار بالمخدرات !!
الاتجار فقط مو المتعاطين
الطفل العراقي صار يتعرض للاغتصاب و الضرب و الاهانه و يتاجر بالمخدرات
ما تحسون ان الموضوع بيه ذنب ؟
بيه مقصرين ؟
اكو ناس مقصره ؟
تعرفوهم لذوله الناس المقصره ؟
اي احنا
احنا كلنا
اهملنا اطفالنا فما صرنا نراقبهم
و اللي يزوج أولادهم و بناتهم و هم ما مستعدين اصلا يكونون امهات و إباء صالحين
و فقدنا المراقبه على أولادنا
و خليناهم ضحيه الشارع و التلفون و أصدقاء السوء
اليوم قبل ما اسمع قضيه حوراء اريد اكتب رساله عتب كبيره لكل الأمهات لان متعب منظر هالاطفال اللي عايشه على الجبس و العصير و المميه القذره بدون تنظيف و لا تعقيم و ردت اكتب بوست قصير اكول بيه ( بويه رضاعه ما ترضعن طبيعي حليب ما بيجن و فطام ما تفطمن لان ما بيجن تتحملن بجي الجهال و عايشين الجهال ٢٤ ساعه على الموبايل و تخلفن كل سنه اثنين المن مخلفات؟ )
راقبوا_جهالكم
تره الجهال كاتلها الضيم و الله
د. سيف سمير البياتي اخصائي طب الاطفال
from د. سيف سمير البياتي