هو شنو مقاومه الانسولين ؟
مقاومه الانسولين تعريفها يختلف بين مؤسسه طبيه و أخرى بس تجمعها السمنه و ارتفاع الدهون و ارتفاع الضغط
ممكن اللي يقرا هذه الأسطر يكول ( هذا اكيد دكتور سوران منزل البوست او دكتوره زينة ) بس لا هذا البوست اني منزله د. سيف سمير البياتي اخصائي طب الاطفال
احجيلكم شي
بدينا يا جماعه نوصل لعلامات مقاومه الانسولين مبكرا
و بدينا نشوف سكر بالمراهقين اكثر
و بدينا نشوف ضغط اكثر
و التراكمي عند المراهقين بدا يصعد
و بدينا نشوف سكر نوع ثاني عند اطفال السكر النوع الأول نتيجه السمنه !
موضوع مقاومه الانسولين يرادلها جهود و جهود و جهود يا ريت نكثفها
اول سبب لمقاومة الانسولين هي السمنه
الجيد بالموضوع انه مقاومه الانسولين ممكن تدخل مرحله استشفاء
استشفاء يعني شنو؟
يعني دام وزنك طبيعي و اكلك سليم راح تكمل حياتك صحي
هل ممكن يطيب ؟
احجيلكم تجربتي
اني وصلت تراكمي 6.4 و لما عرفت انه اني بحاله ما قبل السكري نزلت وزني و قطعت تماما السكر و الخبز الابيض و السكريات الزايده نزل التراكمي إلى 5.4 و بعدها صار ٣ سنوات افحص و التراكمي ماشيه أموره
زين شنسوي احنا ؟
1. قيس التراكمي اذا عندك سمنه كبالغ و اذا طفلك المراهق بدت عنده علامات مقاومه الانسولين من تصبغات سوداء بالرقبة اسأل طبيبك المعالج حول إجراء فحص التراكمي
2. الاطفال البدناء ما دام بعدهم ما دخلوا المراهقه انتبهوا لوزنهم بعد عمر السنتين
3. طفلك اذا وزنه اكثر من الحدود الطبيعيه و بدا عنده كرش حتى لو وزنه طبيعي انتبه لاكله
4. لكيت التراكمي صاعد او سمنه بدت عند المراهق ابدي حمية تقلل النشويات و الدهون و تزيد الخضراوات و الالياف
5. امشي يوميا من ٣٠ إلى ٦٠ دقيقه و انت الربحان
او سجل بنادي رياضي اذا عندك وقت
6. ما فاد ما ذكر أعلاه
راح يبديلك الطبيب علاج و ع الاغلب راح يكون حب السكر اللي هو الميتفورمين اللي هو امين من عمر ١٠ سنوات بس الا بوصفه طبيب
🥲 اخواني اخواتي
انتوا مدا تشوفون اللي دا اشوفه
اطفال أعمارهم ١٣ و ١٤ سنه عدهم سكر و ضغط
اطفال أعمارهم ٣ سنوات و ٤ سنوات عدهم سمنه و أمهاتهم بيدهم مشهيات حتى يسمعون اكثر
امهات جاهلات بكل شي و كلشي ما يعرفن بالدنيا عدا جمله ( ما ياكل ) و جمله ( اريده يسمن ) و كأنما خرفان و نريد نسمنهم
هذا البوست قاسي
اي قاسي
بس ما اريد أولادنا تصير بيهم امراض بأحلى عمر
عمر المراهقه و العشرينات و بدايه الثلاثينات
أبدوا صح
عمليه تصلب الشرايين تبدأ من عمر مبكر جدا
و بلا دلع الحلويات و الجبس و العصير
وكلوا صح
انتوا مسئولين عنهم فيما بعد
د. سيف سمير البياتي اخصائي طب الاطفال
هذا البوست لا يشمل اطفال تحت عمر السنتين
from د. سيف سمير البياتي