زوجج يساعدج؟
سؤال طرحناه ، وكانت اغلب الاجابات ايجابية والحمد لله
وبعض الازواج امتعضوا واعتبروه تحريض و(تكبير راس للمرأه)
وان مهام الرجل كثيرة لدرجه هو غير مسؤول عن اي شي يحدث عندما يعود للمنزل
سوى الراحه والاستجمام والاسترخاء 😌
نسولف شوية ونكول ،
هو اساسا ليش الرجال والمرأة يتزوجون؟
هل يتزوج الزوج حتى يجيب عامله للمنزل تنظف وتطبخ صبح وليل ؟
وهل تتزوج المرأة حتى تحصل على بنك سيوله مستمره توفر لها كل ما تريد النفس وتشتهي الاعين؟
اذا كان هذا هدف الزواج، فماله داعي تكملين قراءة البوست عزيزتي، و عزيزي البنك،
اما اذا كان الزواج سببه ان( الرجل والمرأة ) وجدا في احدهما الاخر ما يكمل نفسه ويجد في حضوره راحته ويشعر بالانس بصحبته ، فهذا البوست الكم 🤗
من لكيتوا اكو تقارب بيناتكم معناها اكيد اكو توافق فكري ايضا وهذا التوافق حيخليكم ترغبون بتكوين اسرة مع بعض
هاي الاسرة متقوم بدون تعاون دائم ومشاركات مستمره
الاسره مابيها (طبخ وتنظيف عليج والفلوس عليه)
الاسرة مابيها (تبديل حفاظات عليج والطلعة عليه)
الاسرة كلها تتشارك حتى تقدم الافضل والافضل
الزوجه تقدم افضل ماعدها من رعاية وحنان واهتمام واسناد
والزوج يقدم افضل ماعنده من اجتهاد وعمل ودعم وحمايه
واذا احد اركان هاي الاسره وكع ، يجي الاخر يسد عنه حتى لاينهدم البيت
مو يكول والله اني شعليه هاي شغلتج؟!!
والله اني شعليه هاي شغلته؟؟!
هاي مو اسره هاي عباره عن بزنز ، من كل واحد يريد يحصل اكثر شي باقل مجهود 😅
زين هسه نسولف وي الزوج شويه
اخويه ، ابو الجهال
كان النبي محمد صلى الله وعليه وسلم (يخصف نعلَه، ويخيطُ ثوبَه، ويعمل في بيته كما يعمل أحدُكم في بيته)
يعني النبي الي هو خاتم الانبياء والمرسلين الي شغلته اصعب شغله وتكليفه اكبر تكليف ، ميكعد ببيته فقط يسترخي ويستجم 😅
لا عادي يتصرف بشكل طبيعي يقوم بواجبات نفسه وكان خيرهم لاهله
وهذا لايعني ابدا اذا جنت تعبان او تمر بظرف لازم تكوم تكرب !
بالعكس هنا يجي اهميه دور زوجتك من تسد عنك وتخليك ترجع بكامل قواك حتى شنو؟؟؟
حتى تساعد ببناء الاسرة من تربية، من كلام طيب من مساعده بسيطه
مو حتى تطلع مع اصدقائك، وتلعب بلي ستيشن وببجي لما تبقى من الوقت ويوميا على مدى 7 ايام بالاسبوع و31يوم بالشهر وتكول دا ارتاح وانفه عن نفسي!
زين وزوجتك؟ متريد ترتاح وتنفه عن نفسها؟
اذا تريد تعيش هيج نمط معناها انت متريد اسره انت تريد تكون حر نفسك و(سنكل)
وعليه ليش تزوجت من الاساس؟
راجع نفسك وقيم اولوياتك بالحياة
الاسرة تعاون، محبه موده،
مو ناس تعيش على اكتاف ناس ،
وتذكر احنا رب العالمين خالقتنا لغاية وهدف والي هو اعمار الارض وان نربي جيل صالح مهذب مثقف
مو خلقنا حتى نكضي كل شبابنا وطاقتنا بالونسة!
ونسولف وي الزوجه هم
زوجج اذا كان يشتغل بجد ويتعب علمودكم ومايقصر بشي ، ساعدي وقدمي له الاسناد وخصوصا من يتعب او يمر بظرف صعب ، مثلا دراسات، مثلا بزنز جديد
لان هيج امور تحتاج جهد اضافي وتعب اضافي
وللامانه ما شفت زوجه تقصر من تشوف زوجها صدك محتاج مسانده بالعكس اصلا تفرح بجهدها لان فعلا بي قيمه
مو مجرد تكرب خاطر يعبر مرحلة بالببجي!!
نعيد ونذكر
الزوج والزوجه احدهما يكمل الاخر
وتذكري زوجج ايضا ما مجبور (شرعا) يصرف هالمبالغ الطائلة علمود حفلة او صور او فستان
وانما هذا من الاحسان وزيادة منه وليس واجب
بقت نقطه مهمه اخص بيها النساء
الزوج ، غالبا هو مايتعاجز من المساعده لكن 90% من الحالات هو مايعرف شنو المطلوب بالضبط
فانتي من تحسين نفسج تعبتي ، صار الامر فوق طاقتج
اطلبي منه مباشره يسوي شي محدد ومباشر
مثلا : بلا زحمه عليك الزم الطفل دا اروح اصلي
بلا زحمه عليك لم السفره دا اغسل للطفل
وغيرها من المهام البسيطه الي حيقدمها بشكل تلقائي ، لكن غالبا المرأة تنتظر منه هو من ذاته يكوم وتزعل من تشوفه مايسوي من ذاته ، فاعيد واكلج الذكر دماغة ميحضر بكل موقف حضور كامل فانتي وجهي حتى تبقون على سعاده وتوافق وانسجام
وتذكروا دائما
(وَمِنْ ءَايَٰتِهِۦٓ أَنْ خَلَقَ لَكُم مِّنْ أَنفُسِكُمْ أَزْوَٰجًا لِّتَسْكُنُوٓاْ إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِى ذَٰلِكَ لَءَايَٰتٍۢ لِّقَوْمٍۢ يَتَفَكَّرُونَ)
صدق الله العظيم
امنياتي لكم باسرة دافئة ومتعاونة 🌷
د.اسماء اسماعيل البدري
from د. سيف سمير البياتي