سألتي نفسك كم سؤال قبل ما تخططين للطفل القادم ؟
شنو دكتور ليش هو المفروض اسأل نفسي قبل ما اصير حامل ؟
اي طبعا و لازم تسألين نفسك كثيرا
هن 12 سؤال اسألي نفسك قبل الحمل بالطفل الاخر
نبدي بيهن سؤال سؤال
1. هل قدرتك الماديه تتحمل الطفل الثاني ؟
مصاريف الطفل بالأخص اول سنه مو قليله ابد
بالأخص مع انعدام الرضاعه الطبيعيه و صعود سعر الدولار و تحديد قدرتنا الشرائية
فهل تستطيع تحمل تكاليف الطفل الثاني
مقوله ( يجي رزقه وياه ) نتركها على جنب و نشوف رزقنا يكفي للطفل الجديد
و الحل :
نكعد نكتب شكد مصاريف من الحمل للانجاب و كل المصاريف لأول سنه
2. طبيعه حياتكم شونها ؟
هل هي منتظمه ؟
اطفالك كبروا لو بعدهم صغار و راح تضيفين صغار للصغار ؟
اذا حياتك مستقره و أولادك كبروا و الروتين ماشي
هل مستعده انت لاعاده ترتيب الروتين و الحياه؟
3. شريك حياتك شنو رأيه بالموضوع ؟
يعني اسمع انه الاب يريد طفل او الأم تريد طفل و الشريك ما يريد
فنسأل الرأي
فنسأل شريك حياتنا بالرأي و شنو رأيه اذا رفض الطلب مو نقنعه لان هذا رأيه و ممكن يكون غير مستعد
كذلك حياتكم الزوجيه شونها
هل بيها مشاكل ؟
اذا بيها مشاكل ليش نزيدها بطفل اخر
و الطريقه مال نربط الزواج بطفل إضافي اثبتت فشلها بأكثر من زيجه فلا نستخدمها
4. عندك غرفه للطفل الجديد ؟
اذا ما عندك غرفه للطفل الاخر هل مستعد للفوضى؟
اطفالك اللي موجودين الان اصلا عدهم غرفه مستقله ؟
طفلك الاول اذا عنده غرفه راح يقبل يجيه اخ يشاركه الغرفه ؟
هنا نذكر ان بالاطفال اللي عدهم تحسس قصبات او ربو يفضل كل طفل ينام بغرفه على حده
5. هل ظروف الطفل او الاطفال المولودين اصلا تسمح بطفل إضافي اخر ؟
يعني مثلا الطفل الاول مو مريض بمرض مزمن او عنده مشكله نفسيه
هل وجود الطفل الاخر راح يأثر على رعايتك للطفل الاول ؟
6. كيف يستحمل طفلك الطفل الاخر ؟
ما بيها اي شي ان تستكشف الامر بينك و بين نفسك
فالطفل الجديد ما راح ينضاف بس الك راح ينضاف لكل الموجودين بالبيت
فهل طفلك مستعد ؟
7. كم عدد الاطفال اللي تريد تنجبهم؟
1 او 2 او 3 او اكثر
8. عملك شونه ؟
هل عملك بيه مسؤوليات كبيره؟
يعني راح ينطوك اجازه لرعايه طفلك؟
تكدر تشتغل من البيت ؟
هل رزقك ثابت ؟
9. هل انت مستعده للحمل و النفاس مره اخرى ؟
الحمل صعب مو؟
وهنا على وهن صح ؟
هل انت مستعده مره ثانيه للحمل ؟
10. هل انت متأكده من رغبتك بالإنجاب؟
يعني هي مجرد رغبه بجلب طفل لو حاجه حقيقه ؟
اسهل طريقه حتى تتأكدين من الموضوع اخذي قيلوله اذا استمتعي بالقيلوله هاهيه انت ما تردين طفل جديد هههههه
اذا تحبين تتأكدين اكثر شوفي ام جديده و شوفي حياتها اذا عجبتك حياتها هاهيه انت متأكده
11. ليش دا تفكرين بطفل جديد ؟
يعني ما عندك بنيه و تردين بنيه ؟
او ما عندك طفل ذكر و تردين ذكر ؟
مشتاقه للطفل و مرحله الطفوله؟
12. اذا قررتي عدم الإنجاب هل راح تندمين فيما بعد؟
اصعب سؤال هو هذا
و الجواب السهل هو تخيلي فقط شكل عائلتك بطفل اخر هل هي أفضل بهذا الشكل لو مع طفل اخر
فكري جيدا
و فكر جيدا
و اقروا البوست ثاني و ثالث و رابع و اخذي راحتك بالتفكير
د. سيف سمير البياتي اخصائي طب الاطفال
from د. سيف سمير البياتي