#الاستحقاق
الجزء الثالث
ماما اريد لعبة
دكافي العاب غرفتك مليانه العاب 😡
ماما اريد لعبة
مو كتلك عندك كومه!!
ماما اريد لعبة
ماعندي فلوس
بلي شفت اكو بالجنطه فلوس
لا مو مالتي
….🌸🌸🌸….ا
الاستحقاق موضوع طويل وعميق وعلى مستويات،
استحقاق نفسي، جسدي، مادي ، وغيرها
حنتكلم اليوم عن الاستحقاق المادي
اختصر واكول
الطفل ماتنملي عينه اذا ميحس هو يستاهل الزين
مو شرط يحصله
الموضوع مجرد شعور
اذا ما وصل له شعور انه هو يستحق ويستاهل
محيصير عنده دافع ينطي ويشوف غيره هم يستاهل
الشعور هذا يوصل له من
1. نرخي نفسنا ومانبقى نتشنج بكل مره يطلب الطفل شي مادي
2.نجاوب اجوبه لطيفه خفيفه
3.نطلق العنان للخيال
4.نحط خاتمه او نتركها مفتوحه حسب الموضوع
ناخذ مثال:
👼ماما اريد لعبة
🧕🏻شنيه اللعبه؟؟
👼اريد ….. امممم… ديناصور!
🧕🏻اي شيسوي هذا الديناصور
👼ديناصور يمشي ويطلع نار!
🧕🏻حلووو جبير لو صغير؟؟؟.
👼جبييير كلششش
🧕🏻اكبر منك؟؟
👼اييييي
🧕🏻ويتسلق على الحايط وعلى السقف؟
👼ايييي
هيج حوار خيالي يجوز هذا كل الي يحتاجه طفلك
وتلكاه راح يضحك وينسد الموضوع هيج بكل بساطه
لان عبر عن رغبته وشافها متقابلت باسستنكار!
حس هو مقبول ورغباته مقبوله
حتى لو متنفذت
حس هو يستحق يتخيل ويستحق يمتلك اشياء حلوه
حتى لو محصلها
زين في حال ما انسد الموضوع هيج
وبقى يطالب بهذا الشي بشكل ملح وجدي
هنا عدنا هواي طرق وحسب عمر الطفل
منها نتفق مثلا هو يجمع المبلغ
او ينطي مجموعه من العابه المركونه
او ينتظر لوقت مناسب
وغيرها من الحلول الي اذا اتفقنا عليها واجب صار التنفيذ
واذا كان طلبه غير قابل للتنفيد نتكلم بكل صراحه واريحيه
بابا اريد تجيب سياره
اول شي ريلاكس
ثاني شي ندخل بالتفاصيل والخيال
بعدين وره ماكملنا رجع يكول اريد سياره
نجي نحجي الصدك ونكله والله حبيبي اني هم يعجبني اجيبلك احسن سياره
بس ماعندي فلوس كافيه للسياره
لان الفلوس الي عندي لازم نجيب بيها اكل، ومي…. الخ
ومايبقى يكفي للسياره اعتذر
انت من تكبر وتبدي تشتغل تكدر تجيبها لنفسك
طبعا هيج كلام على حسب العمر بس بالتقريب حوالي 5 سنوات وفوك
واغلب الي جوه هذا العمر يكتفي بالخيال 🌸🌸
ملاحظة: شفت بالتعليقات كاتبين اذا متكدر تجيب كلشي يريده الطفل لاتخلف
هذا الكلام محلو وغير واقعي
وعمره ماجانت التربيه بكثره تلبيه الطلبات
الطفل الي كلشي يريده يحصله حيصير طفل متطلب فارغ مايشبع
والاهل مو من واجبهم تلبيه كل طلبات الطفل
اكو امور اساسية
الي هي توفير المسكن، الملبس، المأكل والتعليم
ويبقى كل شخص حسب قدرته من احسن شي او اقل شي لايكلف الله نفسا الا وسعها 🌷
د.اسماء اسماعيل البدري
from د. سيف سمير البياتي