كننا موظفين اني و زوجي
كان يومنا يبدي مبكرا الساعه 5 الفجر اكعد و اكعده و اخليله أغراضه و اسويله فطوره و ادزه لمدرسته الساعه بال 6 و نص
بالسته و نص اكعد اخوه الأصغر منه و هم اسويله فطوره و يروح لحمامه وراها بال 7 و نص ادزه للروضة القريبه
و بسرعه ابدل و اروح لدوامي
و ارجع بسرعه حتى اوصل قبل الاطفال
اصب الغداء و ابدي اقريهم و نحل الواجبات وراها ساعه تلفزيون و ساعه لعب
و بثمانيه يكونون نايمين
وراها اكيد ما انام لان ماكو احد يضيع شي من هذا الهدوء
اشرب شاي و اتفرج تلفزيون و ادعي الله يكبرون حتى اشبع نوم و راحه
و مرت الايام
و كبروا
و صرت وحدي طول النهار
مشتاقه لحضن بعد المدرسه
و مشتاقه انه انومهم وياها بوسه
و مشتاقه اركض وراهم و ارتب هوستهم
و مشتاقه للركض وراهم و تعالوا هاكم اكل
مشتاقه للأسئلة الغريبه اللي كنت اتافف منها
و مشتاقه لغسل الحياطين اللي متروسه اصباغ
مشتاقه لفرحتهم بملابسهم و لعباتهم الجديده
مشتاقه لفرحتهم بلبس العيد و حتى مشتاقه لتعب السوق و اختيار ملابس العيد
و مشتاقه لفرحه عيونهم من انطيهم نستله او جكليته
هالايام هذه صاروا شباب و كبروا
يرجعون للبيت ياكلون و يرحون لغرفهم و ما ينتبهون شنو طبخت اصلا و لا يهمهم
مع انه اني تعبت حتى اسويلهم الأكل اللي يحبوه
نوبات و ايام و ليالي اظل انتظر يكولون لي الله ماما نحبك بس حاليا تمر ايام و ليالي مشغولين بالتلفونات
يا ريت مره يجون بالليل يكولون خفنا و جينا ننام يمك
ياريتهم يكعدوني من النوم علمود اسويلهم فطور
كمت اكعد من النوم الكاهم طالعين اصلا
حتى الحضن مدا أكدر احضنهم مثل قبل لان صرت أقصر منهم
امنيتي و كل اللي اتمناه حضن صغير منهم مثل قبل و نظره لعيونهم و هي تكول نحبك ماما
لكل أمهات هذا الجيل
ابدا لا تكولن تعبنا من الجهال
استمتعوا بالتعب الجميل
من مخيله الكاتب
د. سيف سمير البياتي اخصائي طب الاطفال
from د. سيف سمير البياتي