اكول مرحبا و السلام عليكم
هذا الطبع مال جبر الاطفال على الاكل شوكت تجوزن منه ؟
نفسيات الاطفال كاعد تتدمر يوم بعد يوم
و انت ما هامك الا ان يكمل الطفل صحنه !
الطفل ياكل من يجوع
و من يجوع ياكل
هذا هو و خلص
ماكو بكل كتب الطب شي اسمه اجبر الطفل على الاكل
لان الجوع احساس طبيعي يولد ويانا
و من يجوع ياكل
وحده تخفف الشوربه بالمي و تدفعه بالسرنجه
و وحده مدري شتضيف مشهيات للاطفال اللي وزنهم فوق الطبيعي
و وحده تشربه حليب بالبيض حتى يسمن الحنفيش
و وحده مسويه مؤقت حتى ترضع الطفل بالليل لان تحب السمن
الامومه مو مشروع تربيه العجول
الامومه هي البحث عن الشيء الأفضل لطفلك
كل الدراسات تكول الأمهات اللي يجبرن الاطفال على الاكل يجن من بيئه فقيره معدمه قليله الثقافه
هل انت قليله الثقافه ؟
زين هو اكو تاثير سلبي لجبر الاطفال ولو لفظا على الطعام ؟
يعني اكو تاثير سلبي لجمله ( بس هاي اللكمه و بس ) ؟
الجواب اجانا بدراسات عديده تكول
ان جبر الاطفال على الطعام يؤدي الى
1. قيء في الحال و عسر هضم
طبعا ما اكثر من قابليته
2. كل الدراسات تكول ان جبر طفلك على اكل فلان اكله راح يؤدي الى كرهه لهذه الاكله لكل عمره فمخه راح يربط هالشي ويه التجربه السيئه اللي تعرضلها
3. تكول الدراسات ان جبر طفلك على الطعام راح تؤدي الى ان ياكل طفلك اقل و اقل و اقل
بين قوسين سديتي نفسه سد
4. هناك علاقه وثيقه جدا بين الاطفال اللي يتم جبرهم على الاكل و الاطفال اللي راح يصابون بالسمنه و اضطراب الشهيه المرضي بالمستقبل
5. كلما تجبره على الاكل الصحي راح يحب الاكل الحلو الغير صحي
6. راح تخلق صوره مشوهه عن الاكل و صوره الاكل بدماغ طفلك
7. اهم شي تذكر
انه الطفل اللي ما يحب فلان اكله الان
ممكن جدا يحبها بالمستقبل
اخر كلمه
الجوع احساس طبيعي يخلق ويانا
لو تعلموهم على الاكل الطبيعي من البدايه
و تفطمون من المميات بعمر سنه
و تقللون العصير و كل الطاقه المشروبه
حتى مناعتهم و صحتهم راح تفرق
و بكيفكم بعد
د. سيف سمير البياتي اخصائي طب الاطفال
from د. سيف سمير البياتي