شون اقلل الارتجاع؟
الارتجاع هو حاله عوده الحليب من المعده إلى المريء و منها للفم
و تحدث للاطفال بأول 6 أشهر من العمر
شون اقلل الارتجاع
١. ارفعي راسه هوايه عند الرضاعه و ظلي خليه مرفوع لمده ربع ساعه إلى نص ساعه بعد الرضاعه
٢. أبدا لا ترضعين طفلك و هو مستلقي و نايم
٣. لا تلهي و تجنبي الضوضاء من يرضع خليه مرتاح و هاديء
٤. تأكدي من ثقب الممه مو صغير حتى لا يشفط هوا
٥. أبدا لا ترضعيه هوايه و قللي الكميه او قصري مده الرضاعه
٦. لا تنسين التربيت على الظهر و مو الا يتريع بس المهم تسويه بنص الرضعه و بعدها
قريتي النقطه ؟ بنص الرضعه اي نعم
٧. من تربتين على ظهره لا تخلين بطنه على صدرك و الا رأسا راح يتقيء لان يزيد ضغط البطن
٨. خلي طفلك ينام على ظهره من هو نايم
٩. من هو كاعد و انت كاعده خلي يتمدد على بطنه بس انتبهي لا تغفين او هو يغفو
١٠. ارفعي راس الطفل: تدرين احنا جوه السنه ما ننصح بالمخده بس ننصح جدا انه ترفعين الفراش لدرجه ٣٠ درجه للأطفال اللي عدهم ارتجاع
١١. ثخني الحليب باستخدام السيريلاك رز و هو انه تخلين خاشوكه شاي لكل رقم حليب و يرهم لأي عمر بعد عمر الشهر و هذا مو اكل حتى تكولون دكتور مو كلت الاكل وره ال ٤ اشهر هذا لغرض طبي
و لا تتفاجئين اذا صار امساك لان على الاغلب الرز يسوي امساك
تكدرين تستخدمين سيريلاك شوفان لنفس الغرض بس مو بنفس كفاءه الرز
اذا فلوسك زينه اكو حليب مضاد للارتجاع #ارتجاع
ملاحظه ما ننصح بأنه نخلي اي شي بالممه عدا الحاله هاي
١٢. انتبهي لاكلك اذا ترضعين طفلك طبيعي و بالأخص الحليب و مشتقاته و البرتقال و الحمضيات و الكاكاو و القهوه و كثره شرب الشاي( موجود بوست عن هذا الموضوع بالصفحه )
١٣. عالجي النشله: هوايه من الأطفال تزيد عدهم حاله الارتجاع من ينشلون فلازم تعالجيها
١٤. قللي استخدام الملهيه فهي من أهم أسباب اللي تخلي الطفل يبلع الهوا ويه الرضاعه بعد ال ٤ أشهر
١٥. لا تنسين استشاره طبيبك اذا رغم هذا ما فاد و راح ينزل بوست عن شوكت نراجع الطبيب
شكرا الكم
كل البوستات اللي تخص هذا الموضوع تلكوها بهاشتاك
#ارتجاع
د. سيف سمير البياتي اخصائي طب
from د. سيف سمير البياتي