اعرفها قبل 5 سنوات
كل زياره
اكولها وزنه عالي انتبهي
و كل مره مصره انه اكتبله مشهي و هو وزنه فوق الطبيعي
و كل مره تكولي انطيه هذا ( و تطلع المشهي ) و ابدي اعتراضي
و كل مره اكولها وزنه مبالغ بيه
اتركي المشهيات
قللي النشويات
قللي العصير و الجبس و الاكل من بره
بس منو يسمع ؟
راجعتني اليوم بعد غياب سنتين
الطفل عمره 11 سنه و وزنه 115
و بادي عنده سكر نوع ثاني و ضغطه صاعد
تعال ضعفليا !
اضعفه شلون
و انت ما خليتي مشهي بالدنيا ما انطيتيه اله ؟
اضعفه شلون و الطفل صاير يتريك ٧ بيضات و ٥ صمونات و يشرب لترين بيبسي و يعتبره سناك
السمنه بعد السنتين مرض
و كالولك ضعيف و كالولك ضعفان
تأكدي من شي واحد فقط
التسمين فقط للعجول
طبعا تحاليل الطفل سيئه
تراكمي مالته 9 بالميه
و الدهون صاعده
ضغطه أعلى من ضغطي
السمنه مرض و ام لكل الأمراض
فكري بعقل طفلك
لا تفكرين بكرشه
عقله راح يقوده لمستقبل افضل اله مو كرشه
د. سيف سمير البياتي اخصائي طب الاطفال
from د. سيف سمير البياتي