يكولك اكو طبيب اسمه هارلي هارلو
هذا الطبيب هو طبيب نفسي و كان مهتم بموضوع الحب و الارتباط النفسي بين الطفل و أمه
و لان اقرب مثال حي للدراسه هو القرد فكانت تجاربه على القرود
هارلي اخذ قرده ولدوا توا و فصلهم عن امهم
و وضع القرد الصغير بقفص
و القفص بيه لعابتين صغار
لعبه معدنيه تنطي حليب
و الاخرى لعبه قماشيه لا تنطي لا مي و لا حليب
اللي شافه هارلو ان القرد يقضي اغلب وقته يم اللعابه القماشيه اللي ما تنطي لا مي و لا حليب !!!
التجربه أكدت موضوع الترابط اللمسي بين الطفل و أمه
بحيث صار لزاما اول ما ينولد الطفل يتخلى جلده على جلدك مباشره
صار من الضروري ان تحضنين طفلك بعد الولاده
و ان ترضعيه طبيعي شكد ما تكدرين حتى يلتصق اكثر بيك و يصير شاب و تصير شابه مكتفيه نفسيا
المهم نرجع لهارلي هارلو
هارلي جاب لعبه مخيفه و دخلها ع القرد
و اكيد تعرفون القرد وين راح؟
اي نعم راح و اختار اللعبه القماشيه
بس مو هنا الصدمه !
الصدمه من نزع القماش من اللعبه و صارن الأمهات الاثنين معدنيات و دخل اللعبه المخيفه على القرد
القرد أظهر سلوك غريب !
القرد بدا يتكور و يحضن نفسه بنفسه
و هو يماثله شعور الخوف و البكاء المتواصل و عدم احساس الطفل بالأمان و الانعزاليه
التجربه رغم اختلافي ويه المبدا الأخلاقي الها
الا انها تكوللنا شكد مهم حضنك لطفلك
و شكد مهمه عاطفتك لطفلك
و شكد مهم انه ما تكونين قاسيه ويه طفلك
و شكد مهم ان تكون اب حنون و دافيء بدون إفساد او تدليل
د. سيف سمير البياتي اخصائي طب الاطفال
فيديو التجربه بالتعليقات
from د. سيف سمير البياتي