الى متى ابقى انطي فيتامين دي ؟
الى ان يشاء الله
هذا الجواب هو اقصر جواب عن الموضوع
فيتامين دي من الفيتامينات المهمه لجسمنا و خصوصا بعد موضوع كورونا و لتدخله بعمل المناعه و غيرها
خلي نشوف الاخرين شكد ينطوه؟
تركيا تنطيه لمده سنه بمراكزها الصحيه
امريكا تنطيه من عمر يوم و تكول استمر عليه دام الطفل ما ياخذ حصته من فيتامين دي
البريطانين بالازمه الاخيره مال كورونا نصحوا انه الكل ياخذون فيتامين دي بجرعه ٤٠٠ وحده دوليه و نزلت المصدر قبل كم يوم
الإيطاليين يكولون انطوا فيتامين دي لكل الاطفال اقل من عمر سنه
اني اكتبه الى عمر سنتين او احيانا اقل اعتمادا على اكل الطفل و شربه و اخذه لفيتامينات اخرى و تعرضه للشمس
بس اول ما يجيني الطفل اللي يرضع طبيعي او اغلب رضاعته طبيعي اكتب فيتامين دي الى عمر سنتين الا في حالات معينه فما اكتبه لان اعتمد على الفحص
هذا جواب السؤال الاول
و اللي مثل ما كلتلكم
اقصر جواب اله هو الى ان يشاء الله
✅ من اي يوم انطي؟
الجواب سهل من اول يوم
✔ السؤال الثاني هو
كم قطره انطي
و الله ما ادري
و بصراحه سؤال جدا محزن من اقراه بالكروبات او اقراه بالتعليقات و الاحزن من اقرا الجواب قطرتين او ٢٠ قطره او ٣٠ قطره او ٥ قطرات !!!
ليش اني منين اعرف شنو نوعيه القطرات اللي عندك حتى اعرف كم قطره ؟
و انت اللي تجاوبين انت شمدريك اي نوعيه قطرات عدها؟
الجرعه هي ٤٠٠ وحده دوليه تحت عمر السنه و ٦٠٠ وحده دوليه فوق عمر السنه
راح اكتب اشهر قطرات موجوده بالسوق و انت اختاري منها
و نرجع و نؤكد اذا الطفل يرضع صناعي او اغلب رضاعته صناعي اسئلي طبيبك قبل ما تبدين لان الحليب الصناعي مدعم بفيتامين دي
نروح للقطرات
Diabase drops 2 drops by 1
Hidee drops 1 drop by 1
Devit 3 drops 3 to 4 drops by 1
Well baby vitamin D drops 0.5 cc by 1
Active d drops 3 to 4 drops by 1
D COL drops 1 drop by 1
Pediawell drops 400 iu 1 cc by 1
يعني سيسي كامل يطلع ٢٠ قطره
هل الشمس تعوض عن فيتامين دي؟
شمسنا ؟ لا ما اتصور بصراحه لان اشعتها حاره و طريقه التعرض خطا
بس هم لا باس من التعرض للشمس قدر الامكان
اخطاء شائعه؟
مع كل الاسف اكو من يزيد الجرعه بكيفه
مع كل الاسف دا ياخذون ابر الكالسيوم بالحليب بجرعه خطا
مع كل الاسف دا تهملون فيتامين دي
مع كل الاسف دا تصعدون الجرعه شهريا و هذا خطا
د. سيف سمير البياتي اخصائي طب الاطفال
from د. سيف سمير البياتي