ليش ابني ما يأكل ؟
ليش ابني وره السنه قل اكله ؟
الجواب :
بصراحه هي حاجته للأكل علمود النمو قلت
راح اشرحلكم بالغرامات شون وزن الطفل يزيد و بعدها شويه شويه تنقص مقدار الزيادة
الأهم هم محافظتهم على الوزن المثالي
اللي تلكوه بالجداول اللي موجوده بصفحه العياده
أو على الجارتات للنمو في كل مراكزنا الصحيه
#نمو_رعاية
#الوزن_الطول_الطبيعي
اليوم موضوعنا عن النمو يوم بيوم بعد الولاده للاطفال مكتملي النمو
وزن الولاده الطبيعي هو من 2.5 كيلو الى 4 كيلو
باول 7 الى 10 ايام من العمر راح يفقد 10% من وزنه يعني اذا وزنه 2.5 كيلو راح ينزل ربع كيلو خلال اول 10 ايام (عجايزنا يسموه تنشفه الحضينه) و السبب هو قله الرضاعه باول ايام و فقدان السوائل الزايده
من بعدها راح يزيد 30 غرام باليوم يعني تقريبا 100 غرام كل 3 ايام
فنكدر و بكل بساطه نعرف انه الطفل ماشيه اموره من الوزن كل 3 الى 4 ايام و الزياده بالميزان الالكتروني
من يبدي الشهر الرابع راح يقل المعدل الى 20 غرام باليوم الى حد الشهر السادس
من الشهر السادس الى التاسع 15 غرام باليوم
و بعدها يقل الى نهايه السنه الى 12 غرام باليوم
بالمحصله فان وزن الولاده يتضاعف بعمر 4 اشهر
و يصير 3 امثال وزن الولاده بعمر السنه
يعني الطفل اللي وزنه 3 كيلو عند الولاده يصير 6 كيلوات بعمر الاربع اشهر و ورنه 9 كيلوات بعمر السنه و هكذا
الجدول المرفق بيه شرح للي انذكر فوك
يعني ينزل من 30 غرام باول شهر إلى 4 غرامات بالسنه الرابعه يعني الفرق مرات الأضعاف فلا تقلقين دامك مقلله الحليب بعد السنه مثل ما وضحنا بالبوست السابق و مستمرة على محاوله تنويع و إعداد مختلف الطعام حتى يحب كلشي
فابنك ما يأكل بالمقارنة مع قبل اللي بيها زيادة هوايه بالوزن
شكرا الكم
