صباحكم خير و معرفه
اليوم الموضوع صعب شويه يراد ناخذ شاي او قهوه و نرجع نقرأه
الموضوع هو عن الحديد
و ليش الحديد ينضاف وقائيا للطفل بعمر ٤ اشهر إلى ٥ اشهر اذا يرضع طبيعي
و ليش كل أنواع الحليب الصناعي تركز على جمله ( مدعم بالحديد )
يلا خلي نبدي الشرح
تدرون بداخل الرحم يعتمد الطفل على الام بنقل الأوكسجين و لهذا نسبه الأوكسجين مو كلش متوفره للطفل
زائد نوعيه الهيموكلوبين اللي هي الجزيئه اللي تنقل الأوكسجين غير شكل
و النتيجه شنو؟
النتيجه يولد الأطفال بنسبه دم عاليه و كلنا شايفيهم شون يجون حمر عبالك طماطه او ورديين
ممكن نسبه الدم توصل إلى ٢٠
و العادي مالتهم ١٦ او ١٥ او ١٤
هنا شنو راح يصير ؟
نولد الطفل و الف مبروك
و اشتغلت الرئه مالته
بعد هنا ما يحتاج أبدا لهاي النسبه العاليه من الدم
و يبدي الدم يتكسر
لان تعرفون كريات الدم تعيش ١٢٠ يوم فقط وراها تتكسر و يتعوض الدم بدم جديد و خلايا جديده
هذا الدم المتكسر راح ينخزن و ينخزن بمصانع الحديد بنخاع العظم
بس الطفل تغذيته فقط حليب !!!
و هذه المخازن الها امد فمنين يجيب حديد؟
مخازن الحديد تكفي لل ٤ اشهر من العمر إلى ٥ اشهر
بذلك هنا يجي دور الحديد الوقائي اما كعلاج اذا ياخذ رضاعه طبيعيه
او ببساطه تبدين بالاكل و بالأخص الاكل الغني بالحديد مثل الحبوب الكامله
ملخصي من هذا البوست الطويل
انه لا لخرافه اللحم مو زين على الطفل تحت السنه
و هوايه قريت مصادر تكول انه اول اكله هي لازم اللحم
بالعكس
اللحم و الحبوب المدعمه بالحديد و غيرها من مصادر الحديد ضروريه جدا للطفل
و منزل بوست عن مصادر الحديد
اتمنى فادكم البوست
و نهاركم سعيد
د. سيف سمير البياتي
اخصائي طب الأطفال
