اكو اشياء هوايه اشياء مو منطقيه
يعني واحد ليش يسال عنها؟
صح الناس مو متساوين بالتعليم و الثقافه و الدراسه
بس مثلا معقوله اكو احد يصدك انه اذا الام صار عدها غثيان فهذا السبب انه الطفل عنده شعر !!!
ليش هي وين حامل بالرحم لو بالمعده !!
مثلها اللبن و السمك يسوي بهاق ؟
زين شنو الرباط ؟
محد يدري
الاخرى الاخرى دكتور اليوم وكلته موز ما يصير انطيه بيض مو ؟
زين شنو العلاقه ؟
موز و بيض مو تسوون بيهم كيكه الموز؟
لو هاي غير شكل؟
نكمل
الحموضه مو زينه ع الطفل لان يتاخر بالكلام !!
زين ليش ؟
ممكن اكول انه تاذي المعده و ما يتحمل بس الكلام شعليه
مثلها مال ثوم يعالج ابو صفار زين شون؟
اللخ كارثة اخرى مال كاسه روبه بصف الطفل تسحب ابو صفار ؟
ادري امي كاسه لبن لو ماطور مي يسحب ابو صفار
يعني اكو اشياء ممكن نياتردال ( انسان الغاب ) يصدكها و يؤمن بيها
بس ليش هسه دا نسمعها و قسم حتى يسال عنها ؟
اخت من الاخوات قبل كم يوم تكولي دكتور كالولي خلي ثوم لابو صفار
كلتلهم اي و شيصير ؟
تكول كالوا يصير اصفر يعني يسحب ابو صفار
كلتلهم اي عادي هم خليه بالمطبخ يصير اصفر شنو العجيب بالموضوع؟
مثل الاسئله الفوك دكتور صحيح ما يصير نروح للي والده جديد ؟
زين مو انت تولدين بمستشفى بيها ٢٠ وحده توا والده جديد؟
هي دعوه للتفكير قبل ما ناخذ اي اجراء
اكيد ما اكولكم تعاركوا ويه الناس اللي عدهم مثل هيجي افكار
بس خلونا نغير فكرنا و نفكر باشياء فعلا بسيطه تخلينا نتقدم ولو شويه مجتمعيا
و عصريتكم خير بصورة من مراكش المغرب
