#التربية
مشكلة قريتها بوحده من الكروبات …
وبوقتها والله بدون مبالغة حصرتني دمعة وبجيت💔😔
اكو وحده ابنها اسمر غامق ..
وتكول الي حولي كلهم يعيبون عليه ويكلوله اسود ..
لهنا هاي عادي .. طول عمره المجتمع متخلف ..
بس المصيبه وين..
المصيبه من الام ما تتقبل ابنها ..
حتى لو ما حجت بوجهه ..
وما كالت له انت اسود ومحلو..
بس عيونها .. تصرفاتها.. شعورها بالقهره من تشوف يقلدون عليه ..
ومن متردهم ..
ومن متمدح لونه وشكله وكل تفاصيله ..
من بداخلها تكول ياريت لو اكدر اغير لونه 🤦
هاي كلها توصل للطفل … بالتفاصيل الي مننتبه الها ..
بنبره صوتنا ..
ولغه جسدنا الي منكدر نسيطر عليها.. الي هي اكثر شي يلاحظه الطفل… ويفهمه كلش زين
اللي صار …
بيوم من الايام جتي الام شافت الطفل حاط بودرة بيضة على أيديه ورجليه … وكال لها..
ماما شوفي صرت ابيض 💔💔
وفرحان .. !
ويضحك 😔
والمصيبه هم مو هنا..
المصيبه الام برسالتها تكول ..
عفيه ماكو كريمات امنه اكدر استخدمها حته يصير ابيض !!!!!!!
💔💔💔
جديات جديات بجيت
شكد مريضه لعد وشكد ضعيفه وشكد اسيره مجتمع وعادات وشكد عنصريه !
ابنج هذا
ابنج
اسود ابيض اجلح اخضر
سمين ضعيف
شعر مكعكل سرح
قصير طويل
بي شلل بي متلازمة داون
صاحي وقوي
بكل حالاته تحبي .. هذا قطعه منج
هديه من رب العالمين
شنو اريده يصير ابيض!!!
قابل هو لعبه ونختارها !!!
وتره هالشي موجود باغلب العوائل بس يطبقوه بشكل اخر …
البنيه الي تجي تشكي لأمها يقلدون على شعري ،
وتكلها ولا يهمج باجر نروح صالون اسوي سرح!!!
والطفله الي ناعمة وتجي تبجي يم امها وتكلها يقلدون عليه يكلولي معصعصه …و تكلها ولا يهمج .. وتشتريلها مشهي مدري دكسن وتزق بيها حته تصير مدنفشه!!
وغيرها وغيرها
حرام عليكم خلوا الله بين عيونكم ..
حبوا اطفالكم مثل ماهمه..
واذا بيهم مرض عالجوهم…
اذا البنيه حبت تغير مره سرح مره مكعكل هم ساعديها.. بس لاتخليها تكره شي بيها.. ومو هي اختارته..
اكو فرق جبير وكلش جبير
السمره مو تكليلها تعاي اعالجج!! هي مو مريضه
لونها مو عيب
ولا مرض 💔
امدحوا اطفالكم بكل تفاصيلهم ..
باعوا بعيونهم البريئه وكلوا سبحان الي خلقك وصورك وابدعك ..
الف الحمد لله ياربي انطيتني احلى هديه بالكون ..
شكد حلو شعرك .. طولك .. عيونك.. حلك ..
والي يقلد على اي شي بيهم .. ردي
لاتسكتين
ردي
مو شرط تسوين مشكله …
بس لاتسكتين
ابسط شي الي يكول ضعيف محلو..
ضحكي وكولي لاااا حبيبي حلووو
الي يكول ابنج اسووود محلو
ضحكي وكولي فديت الاسمر وين اكو بجماله..
الي يكلج بنتج كفشه محلوه
ضحكي وكولي احلى كفشه بالكون غيرها يتمناها
هذا الرد حتى وإن كان مو قوي ..
احسن بهواي مما تسكتين ….
أما إذا كلتي اي والله شسوي مياكل موتني …
اي والله طالع على أهل امي اسود!
اي والله معذبتني متقبل امشط لها!!!!
ف.. لاحول ولا قوة الا بالله
اذا انتي امه ممتقبله طفلج .. منو حيتقبله؟ 😔
وشلون حيتقبل نفسه؟
اذا الثقه ما اخذها من امه.. مين حياخذها؟؟؟
د.اسماء اسماعيل البدري
