لشوكت راح يبقى كورونا بالعالم؟
قسم ابحاث الامراض المعديه بجامعه منيسوتا نزل مقال عن مستقبل كورونا بالعالم
الملخص قصير جدا ٩ صفحات فقط
اهم اللي بيه
✅هذا هو صحيح فايروس كورونا بس يفرق جدا عن كورونا اللي سوت سارس 1 و ميرس من ناحيه وبائيه
✅ اقرب فايروس ممكن يتقارن بيه هو فايروس الانفلونزا
✅ اوجه الشبه بينهم ؟
1. كورونا و الانفلونزا اللي تصير هي novel viruses
يعني ما متعرفين عليها قبل ابدا
2. الاثنين فايروسات تنفسيه و تنتقل عن طريق التنفس
.
.
و الاختلاف؟
1. فتره الحضانه بكورونا ٢ الى ١٤ يوم في حين بالانفلونزا ١ الى ٤ ايام لذلك كورونا يكدر يختبيء لفتره اطول دون اعراض !!
2. نسبه الاشخاص اللي ما عدهم اعراض
يكولك بكورونا ٢٥% ما عدهم اعراض
في حين بالانفلونزا ١٦ % ما عدهم اعراض
3. قمه الانتقال تصير ويه بدايه الاعراض بكورونا او قبلها في حين بالانفلونزا تكون بعد ما تبدي الاعراض
و هذه نقاط تخلي كورونا اكثر انتقالا من الانفلونزا و حاسبها بمعادلات رياضيه كذلك
نرجع للماضي:
يكولك اكو ٨ مرات صارت اوبئه للانفلونزا من سنه ١٧٠٠ و صاروا بالصيف و بالشتا و بالربيع و بالخريف و ما تاثر بالجو ابد
و كل وباء اخذ فتره من سنه و نص الى سنتين لما اختفى و طبعا انتهوا من الناس صار عدهم مناعه للي سامع بمناعه القطيع
السيناريو الخاص بكورونا مستخلص من كل موجات الانفلونزا السابقه و امامه ٣ خيارات سواء لكوا اللقاح او ما لكوا و شوفولي الصوره
⭕السيناريو الأول : تلال و وديان
اللي هي الموجه الحاليه وراها تجي موجات اخرى كذلك قويه بس اصغر من هذه الحاليه لحد سنه ٢٠٢١ و عادي نعيش وياها و هذه تحتاج الى حظر و تراخي بالحظر و هكذا
⭕ السيناريو الثاني :
هذه مو الموجه الكبرى للفايروس و تجي بعدها موجه اقوى من الاولى اللي احنا بيها بالخريف و الشتا اللي جايات ثم موجات اصغر لما تختفي و هذا نفس الشي صار ويه الانفلونزا الاسبانيه سنه ١٩١٨
لان بدت باذار ١٩١٨ نزلت بالصيف و رجعت ضربت بقوه بخريف نفس السنه و انتهت باخر موجه بسنه ١٩١٩
⭕ السيناريو الثالث :
الموجة الحالية هي الاعنف وانتهي الامر وكل الموجات التالية بسيطة، يكول البحث و هذا يعتمد على شده الاجراءات اللي تسويها الدوله بالحجر و التباعد الاجتماعي
اخر سطرين يكول بيه :
خلينا متحضرين ل ١٨ الى ٢٤ شهر من كورونا
البحث بالتعليقات
توا قريت مقال لدكتور انتوني فوتشيه انه كورونا عائد و لكن يمكن تفاديه
و انه الصين خايفه من اعلان النصر على كورونا لان تتوقع راح يرجعلها
حافظوا على التباعد اخوان قدر الامكان
اجلوا المشاريع اللي بيها تجمعات قدر الامكان
التزموا بيوتكم قدر الامكان
د. سيف سمير البياتي
اخصائي طب الاطفال
