اول ما ينعدي الطفل شتسوين ؟
١. مع السلامه للمدرسه علمود لا يعدي اصدقائه و نظل لفي بينا يا دنيا و من واحد لواحد
٢. ينام بغير غرفه غير غرفه اخوانه او لوحده
٣. حاجاته تنعزل وحدها على امل انه ما يعدي باقي البيت
٤. اذا مريض و يلح الا يلعب ويه باقي اخوانه لبسيه ماسك و لا يقترب من الصغار
٥. الاطفال الصغار تحت ٣ اشهر خط احمر غير مسموحله يقتربلهم المنشول
٦. سوائل دافيه و اللي يحبها و فدوه لعينك مو الا ياكل
و تخبصين الامه العربيه ما ياكل
زهكان
نفسه مسدوده
سوي اللي يحبه من الاكلات
و انطيه سوائل
مي
عصير
حليب
لبن
اللي يحبه
بس لا تجبريه
لعبتي نفسه للطفل و هو اصلا نفسه لعبانه من المرض
شكد تلحين !!!
٧. اذا صعدت الحراره و الطفل ما مرتاح عادي خافض حراره
اذا صعدت الحراره و الطفل مرتاح هاهيه اتركيه على كيفه
٨. العسل رائع بس شرط ان عمر الطفل اكبر من سنه لان ممنوع ممنوع ممنوع ممنوع تحت سنه
و اول علاج انطيه لاولادي من يصير بيهم سعال و رشح او انفلونزا
و انطيه مع الحليب او مع الليمون
العسل هي الماده الطبيعيه الوحيده اللي نزلت بكتاب طب الاطفال العالمي
اللي اسمه
Nelson textbook of pediatrics
بجابتر السعال و الرشح
و هو الوحيد من المواد الطبيعيه اللي اوصفها
٩. ماكو داعي لشرابات السعال اذا السعال خفيف او ينتهي بعسل او ماء دافي
١٠. اي شي اخر تراجعين الطبيب
د. سيف سمير البياتي
اخصائي طب الاطفال
