ابتسامه الطفل اول ما يجي للدنيا شي مبهج و جميل و تروح كل التعب اللي الواحد يحسه
بس دائما الطبيب يسئل شوكت ضحكلك
ما يسال شوكت يضحك لوحده
الطفل يبتسم وحده و هو ببطنك اصلا و اكو اكثر من صوره لاطفال يضحكون او يبتسمون و هم ببطون امهاتهم بالسونار الرباعي الابعاد
الابتسامه هذه نصيحلها منعكس يعني شي ما يسيطر عليه الدماغ مثله مثل منعكس الرضاعه و منعكس مسكه لاصبعك من تخلين اصبعك على راحه ايده
هذه الابتسامه لا تعني شيء على مقياس التطور و غير مهمه سواءا موجوده او لا
.
.
.
المهم عدنا هي الضحكه الاجتماعيه
اللي هي يضحك بالاستجابه الك
و هذه وقتها يفرق حسب المصادر
بس اقرب شي هي ٢٨ يوم
و ابعد شي ممكن ١٢ اسبوع
و اغلب الاطفال يبتسمون اجتماعيا بعمر ٨ اسابيع
ليش مهمه؟
تنطينا فكره عن تواصل الطفل و صحه نظره و صحه سمعه كذلك
تنطينا فكره عن نضوج دماغه لان هذه الابتسامه يسيطر عنها الدماغ مو مثل الابتسامه السابقه
دائما لعبوهم ضحكوهم حفوزهم على التواصل معكم لان هذه النقطه تعني الكثير
و انت شوكت ابتسم طفلك الك؟
د. سيف سمير البياتي
اخصائي طب الاطفال
