اليوم احجيلكم عن موضوع مهم و كلنا مارين بيه مع اطفالنا
اللي هو التقيؤ عند الرضع
اللي احجي عنه هو التقيء المزمن المستمر اشهر
قبل ما ابدي بالموضوع اهم نقطتين احب اوصلها
انه اذا التقيء مزمن و الطفل نموه زين و طبيعي لا تخافين هذا مجرد ارتجاع او مجرد spit up اللي هو ارتجاع جدا بسيط
ثانيا اي علاج لا تنطين للقيء الا باستشاره طبيب
.
.
السؤال اللي يشغل بال بعض الأمهات هو عن طبيعه القيء أحيانا بيه مثل الخثره و أحيانا ابيض ( اللي هو الحليب ) و أحيانا بس مي صافي فشنو الموضوع ؟
الخثره تصير من الحليب يلامس العصاره الحامضه للمعده
و الحليب هو الحليب
اما المي فهو مجرد تقيء السوائل اللي تنتجها الغدد اللعابيه اللي بالفم
و تكثر بفتره التسنين عادي جدا
.
.
اسباب القيء هوايه و نعددهن على السريع
١. عدم نضوج بوابه المريء
اللي هو الرابط بين المريء و المعده
٢. كثر الرضاعه
و هذا سبب هو الغالب بصراحه
لان كلش هوايه ترضعوهم ما اعرف منو صاحب منطق انه الطفل لازم يرضع كل ساعتين حتى لو عمره ٣ اشهر
لا امي
لا اختي
الرضاعه ممكن تكون كل ساعتين بأول اسبوعين فقط
٣. التربيت على الظهر و اللي غالبا يتم بالطريقه الخطأ بحيث تزيد القيء لان تخلوه بعنف على الكتف و بالتالي ضغط كتفك على معدته راح يزيد الارتجاع
٤. النشله و الكحه و السعال ممكن يزيد القيء
٥. التسنين ممكن يسبب القيء بطريقه غير مباشره انه الطفل يخلي اشياء بفمه و هاي الأشياء مو نظيفه و بالتالي يصير التهاب أمعاء او بسبب كثره افرازات الفم من اللعاب
٦. النوم بطريقه خاطئه و خصوصا على البطن
٧. اسباب مرضيه كثيره و مثل ما نوهت ببدايه البوست اذا الوزن دا يقل او اكو دم بالقيء لابد من مراجعه الطبيب
وحده من الأسباب المرضيه هي ضيق بوابه المعده و اللي الحمد لله الله مكنني اشخصها عند مرضى كانوا يعانون من القيء فترات طويله
٨. طبيعيه طعام الام
خصوصا اذا الام مكثره من تناول الحليب و مشتقاته
ممكن تسبب قيء للطفل
٩. عدم الإرضاع بصوره صحيحه
و هذه كذلك تؤدي إلى قيء صافي مثل المي
البارحه نزلتلكم بوست عن طرق الإرضاع
و الطريقه الخاطئه انه ما يتم رفع راس الطفل و إنما و هو مستلقي يتم ارضاعه!!!
١٠. اختيار المميات الخاطئه!
و هذه اوف جدا اوف
دائما هي السبب
أما كبيره جدا و تنزل حليب بسرعه و بالتالي تنملي المعده بسرعه و يتقيء الطفل
او صغيره جدا و يتعب الطفل بسرعه
اذا مشتريه مميه من شركه مرموقه اختاري على حسب المرحله
اكو مرحله ١ و ٢ و ٣ للرضاعه و اذا عندك ارتجاع ابقي على مرحله ١ لحد ما يطيب الارتجاع
و اذا مميه عاديه فعادي لازم ينزل الحليب نقطه نقطه نقطه
١١. آخر سبب هو ضيق الملابس !!!!
هذا انتوا اعترفوا شكد ضيقه ملابسهم؟
و اما الكماط القوي فهو المحفز رقم ١ للقيء عراقيا
و هسه بعد ما عرفتي اسباب القيء
شنو الخطأ اللي كنتي تسويه؟
د. سيف سمير البياتي
اخصائي طب الأطفال
