#التربية
#لاتبچي
#المشاعر_الطبيعية
الجزء الثاني
3️⃣عمر 3 سنوات فما فوق:
هذا العمر لازم يكون عنده تصور واضح عن المشاعر،
البكاء، الحزن، العصبيه،الفرح، وغيرها
ويعرف يوجها بشكل صحيح
وهو موضوع البوست كله،
من الاخطاء الجسيمه هي منع الطفل من الشعور بالمشاعر الطبيبعه، ومنعه من تجريب (الحزن)
ومنعه من شعور (الفشل)
تحت ذريعه “خطيه”
ولا ما اريده يبجي..
وتحت فكره لا ميصير اخلي يبجي!
وطبعا بشكل تدريجي مثل مانعرف كلنا، هاي الامور تصير بالتدريج، مو بارحه 24 حضن وبوس ومنخلي يكول اخ وثاني يوم أي يلا تحمل انت رجال!!
طفل بعمر 3 سنوات لازم نطور عنده التعبير عن المشاعر..
من يصير عصبي، نكله انت عصبي؟؟
من ابوه يتعصب ويصيح، والطفل يستغرب، أو يخاف، نكله يا شوف بابا صار عصبي!!
بس طبعا مو كدام الأب ليروح يشمركم من فوك الحايط 😂😂😂
القصد من يشوف مشاهد تعبير متطرف نوضح له شنو الي كاعد يصير، ونوجهه
العصبي مفروض يهدا بسرعه، وميصير يصيح ويصرخ، مفروض يستغفر ..
اذا ماما عصبت وصيحت .. لازم من تهدا تعتذر
وتكول له اني عصبت … واسفه لان صيحت 👍
وهنا اكو نقطه جوهريه
لاتكولين له اسفه لان عصبت🚫
الاعصاب والتوتر هاي مشاعر طبيعية ومو خطأ نتعصب
الخطا هو التعبير المتطرف عن هاي المشاعر
الخطا هو الصراخ، أو التكسير أو الضرب… الخ
من يتعصب طفلج لازم يعرف شلون يدير الغضب مالته، ويوجهه بشكل صحيح..
من يزعل وينقهر، خل يدير القهر بشكل صحيح
مو غلط اذا بجى لان لعبته انكسرت!
لتكولين له انت رجال .. الرجال ميصير يبجي!!!🚫
هنا لغيتي مشاعر كامله منه بس لان هو ذكر؟؟
خل ينقهر ويبجي! عادي لعبته وانقهر عليها..
واحضني وطبطبي عليه.. وتفاعلي وي بكاءه .. وتعاطفي وياه
كام يرفس ويدفر…
هنا ستوووب 🚫 هذا خطأ نبهي مره مرتين واذا مفاد اهملي وعوفي
الي خلاني اكتب هاي التفاصيل رغم اني غير متعمقه بيها بعدني (الأعمار فوق ال3 سنوات)
هو مشاهدتي لطفل بعمر حوالي 12 واكو اقسم بالله عمره حوالي 17 سنه، وامه تعامله كأنه رضيع!!
تمنعه من الخروج من المنزل الا بصحبتها حصرااا
من يكون اكو جمعه عائله ويحجي ويتفشل ، تدافع عنه كدام الكل وتكول ما اقبل !!!
ما اعرف شلون اوضحلكم الفكره بس انتي كاعد تقتلي حرفيا
شلون حيدخل جامعه؟؟ هم تداومين وياه؟
شلون حيحب بنيه؟؟ شلون حيخطب؟ شلون حيعبر الها ؟؟ لو انتي حتحجين عنه؟؟؟
من حيتعارك وي زملائه المراهقين وكل واحد بيهم يحاول يبدو هو الأقوى.. حتجين انتي تضربيهم عنه؟؟
الموضوع يطول ،
لكن بالمختصر
ارجوكم … مثل ماتفطمين الطفل من الرضاعة
ابدي فطمي من #الاتكال_العاطفي
وهذا يبدي (بدايته) من عمر 3 سنوات
عرفي المشاعر،، شاركي المشاعر.. عبري عن المشاعر
وخلي يعيش تجاربه الخاصه .. ❤️
مع مودتي 🌷
د.اسماء إسماعيل البدري
