شوكت يبدي الطفل يتعلم الحجي
الطفل يبدي يتعلم الكلام من هو ببطنك لان من يطلع من بطنك اصلا هو يميز صوتك فاحجي وياه و غني و هو ببطنك
شون تعلميه يحجي من وكت ؟
١. احجي وياه هوايه و ابدي من اول ايام بعد الولاده
٢. غنيله و اقريله
كلش يحبون الجمل و يحبون تقريلهم و يحبون صوتك لان يعرفوه فاقريلهم
٣. خلي يعيد وراك الكلمات كلمه بكلمه و خلي يكولها أكثر من مره
٤. دائما سمي و اشر
هذا تلفزيون
هذا كرسي
هذا جدو
و عيدها بصوت واضح حتى اذا ما يكولها كدامك
٥. سوي وياه حوارات من يصير عمره اكبر بالسنوات مثلا
اساله و ابدي وياه الحوار
٦. استخدم بالبدايه اللغه اللي انتوا الاثنين تبدعون بيها
مثل العربي و بعدين دخل اللغه الثانيه
وفق قانون والد واحد لغه واحده موجود بوست عن هذا الموضوع يهم عراقيي الخارج حتى يربوه على لغتين
٧. قلل التلفزيون و الشاشات و الموبايل تدرون اكيد لا شاشه قبل سنه و نص بعدها مجرد نص ساعه
٨. من تسولف وياه قلل الضوضاء حتى يسمعك و يستمتع بالحديث معك
شوكت اخذ الطفل للطبيب :
بعمر ١٢ شهر : في حال صار الطفل ما يحجي و ما يسولف و بعمر سنه ما كال لا ماما و لا بابا
و بعمر ١٨ شهر بس يكول ٤ كلمات و ياشر على الأشياء
و بعمر ٢ سنه ما يحجي ولا حجايه لوحده الا يكررها
و بعمر ٣ سنوات لا يسمي الأشياء و لا يحجي كلمه لوحده و ما تزيد عنده عدد الكلمات
من بعد ما فحصه طبيب الاطفال و ارسله للتحاليل الضروريه شون اكدر اساعد الطفل
١. احجي وياه جمل
الأطفال مو كلش يفتهمون الكلمات هم يفتهمون المشاعر و الجمل فاحجي وياه و كانما كاعد تحجي محاوره وياه
سولف و كانما دا تحجون بموضوع مهم
٢. سمي الأشياء مثل ما كلنا فوك و احسبهن و عيد الكلمه
٣. اسال طفلك كلش يحبون الاسئله و الاجوبه
٤. اقره لطفلك احضنه او افتح قصه و الف قصه على اساس الرسوم الموجوده
٥. دفتر الرسوم و الحيوانات و النباتات لابد ما تستغني عنه كلش مفيد و موجود باغلب المكتبات و سعره مناسب
و فائدته عظيمه
٦. غني لطفلك : اركز على الموضوع لان الطفل يحب اللحن و يميز اللحن دائما غنيله و بصوت عالي و اطلب منه يرد عليك
تمنياتي بالسلامه للجميع
د. سيف سمير البياتي
اخصائي طب الأطفال
