٤ مشاكل جلديه و طرق الوقايه منهن
اولا طفح الحفاظات
المشكله الأكثر شيوعا و يصير بيها الجلد احمر
و الوقايه سهله و بسيطه
هي بكثره تبديل الحفاظات او وضع اي مرهم اساسه الزنك مع كل تبديل حفاظ و اكيد اروج لزنك كاستر اويل او زنك أوكسيد العراقي مال شركه سامراء مع كل تغيير حفاظ
٢. جفاف البشره و تقشرها
بشره الأطفال جدا جدا شفافه و حساسه و بالأخص خلال فصل الشتاء و السبب هو البرد و قله الرطوبه
و الوقايه هي تقليل الغسل قدر الامكان و لا تطولين فتره الاستحمام
استخدمي سوائل او صابون تنظيف بدون عطر
و من تنشفيه بعد الحمام بس ربتي لا تمسحين الجلد او تفركيه
استخدمي و كوني كريمه باستخدام اي كريم ترطيب مرتين باليوم او مره
و اذا منطقه صارت خشنه أكثر من الباقي داريها بالكريم المرطب أكثر و أكثر
٣. قشره الراس
شي حميد و غير مخيف و يروح وحده و كل الاطباء يجمعون على هذا الشي
بس اذا حابه يروح تكدرين تغسلين راس الطفل يوميا و تفرشين الشعر بالفرشاه بعد الاستحمام
اذا كثيف و ما فاد تكدرين ترطبين المنطقه باستخدام كميه من زيت الزيتون و وضعها على الراس و بعدها غسلها بأمان
٤. رابع مشكله هي الاكزيما و منزل بوست كامل عنها
تقريبا ماكو شي يمنعها
بس كثر الغسل يزيدها
و استخدام مواد التنظيف القويه و اللي بيها عطور قويه تزيدها
ابدا لا تستخدم حمام حار
و دائما خلي الماء دافيء للتغسيل
و رطبي دائما بالكريم المرطب مرتين أو مره باليوم
حاولي ترضعين طبيعي قدر الامكان
لان ممكن الحليب الصناعي ممكن يزيدها
و اكيد راجعي اقرب طبيب لحضرتك اذا ما استجابت للترطيب
و شكرا
د. سيف سمير البياتي
اخصائي طب الأطفال
