اليوم سئلني صديق انه ابنه يريد يسويله ختان بس يخاف من وضع كورونا شاسوي ؟
و هل انه اجل الطهور؟
مثله مثل الاف الامهات اللي ما راحن لقحن بحجه اخاف من كورونا !
و اللي ما سوه عمليه لنفس الحجه
و بكل مكان الاسئله هي
هل القح؟
هل اطهر ابني ؟
اريد اسوي ليزك لعيوني اسوي؟
عندي عمليه و اريد اسويها؟
اريد اشتري بيت شون؟
و اسئله كثيره كبيره متنوعه تواجه الكل بظل كورونا
اللي نعيشه الان هي فتره انتشار كورونا يعني اذا بيتك ما بيه كورونا فاسلم مكان بالدنيا هو بيتك
– شفتوا وعينا بالازمه؟ يعني ما راح تتحسن الامور لان الاصابات تتراوح بمعدلات عاليه
– حتى لو لكوا علاج فالفايروس راح يبقى ينتشر لان اكيد اكو حالات ما تنكشف اصلا و حالات ما تحتاج علاج
– اغلاق الدوله جربناه و بنص الاغلاق كان اكو اعراس و افراح و تجمعات و الوعي صفر الصفر و زملاء و خريجي كليات و مثقفين هسه دا يسوون حفلات و اعراس و تجمعات
– لا تعتمدون على مناعة القطيع لان لازم ٦٠ الى ٨٠% بالميه من الشعب ينصاب يلا تصير و السويد اللي جربت الموضوع لحد الان فقط ٢٠% عدهم مناعه
– الامل الوحيد هو اللقاح و اللي اغلب الدراسات تكول انه مو قريب جدا و الله اعلم شكد يلا يدخل و يلا نبدي ناخذ جرع و هم ما يفيد اذا مو ٦٠ الى ٨٠% من المجتمع ياخذ اللقاح او الكورونا طبيعيا حتى نحد الانتشار
– هذه الافكار حتى اكولكم انه الموضوع مطول شويه شويه هوايه
لذلك اكول:
🌷 اخذ حذرك و اامن مكان هو بيتك
🌷 احرص على التباعد الاجتماعي
🌷 تعلم ما تسلم باليد و لا بوس و لا احضان
🌷البس كمامه اي كمامه متوفره الجراحيه سعرها مناسب نوعا ما
🌷 اختار طبيب زين و يهتم بالعدوى و اجري عمليتك يمه
🌷اختار مستشفى بعنايه
🌷 روحي لقحي طفلك و لا تنجمعين بالبقيه
🌷 الطلعات نقللها للحد الادنى
🌷الموضوع مطول شويه و الحياه لازم تستمر
اخر خبر اليوم من مركز السيطرة على الامراض الامريكي اللي يكول انه بامريكا ما راح يتوفر اللقاح بكميات كبيره و يرجعون لحياتهم الطبيعيه الا بخريف العام القادم
د. سيف سمير البياتي
اخصائي طب الاطفال
