الحراره حتى تعتبر مرتفعه من نقيسها تحت الابط تلكاها 37.2 درجه و اكثر بدون ما نضيف نص
نجي للسؤال:
❤شوكت انطي خافض حراره؟
اذا الطفل مرتاح و يلعب انطيه خافض لما تكون تحت الابط 37.8 درجه بدون ما نضيف نصف
اذا الطفل تحسه متاذي و ما مرتاح عادي ممكن تنطيه بدرجه حراره اقل
❤ليش الح على موضوع قياس الحراره تحت الابط؟
لان اغلب الاجهزه مال قياس الحراره على الراس و الاذن مو كلش فعاله و دائما تحتاج الى بطاريات جديده
❤زين شوكت اقيس الحراره بالفم؟
فوك ٤ سنين
❤شكد يعتبر مرتفعه حراره الطفل بالفم؟
37.7 تعتبر مرتفعه
❤شوكت انطي خافض حراره اذا اني قست حراره الطفل بالفم؟
38.3 انطي
❤شنو رايك بالمحرار الزئبقي؟
الغي استعماله في البيوت باعتبار ان الزئبق ماده سامه
❤ الكمادات شوكت؟
بعد ما تنطي خافض حراره بساعة
❤ شكد درجه الحراره الخطره ؟
ماكو رقم معين بس اكو عمر معين فالحراره تحت ٣ اشهر خطره
❤ شون ماله علاقه اذا صخن مو ينشمر؟
الشمره تصير بالارتفاع او الانخفاض المفاجيء للحراره
يعني الشمره تتحفز بسرعه الصعود للحراره مو بدرجتها
❤ شنو الهدف من خفض الحراره اصلا؟
حتى الطفل يرتاح لا اكثر و الا الحراره تعني ان الطفل دا يقاوم الالتهاب
د. سيف سمير البياتي اخصائي طب الاطفال
