#سلسلة_الرضاعة_الطبيعية
#مفاهيم_خاطئة
👩⚕️ الطفل شكد عمره؟
👩🦳اسبوعين
👩⚕️زين ليش يرضع صناعي مو خطيه بعده صغير كلش!
👩🦳مو مايشبع دكتوره!
👩⚕️شلون عرفتي مديشبع؟🤔
تجاوب إحدى هذه الاجوبه:
📣🚫 يبقى يبجي
📣🚫حليبي خفيف عبالك مي ميشبع
📣🚫ابقى ارضعه بالساعات وبس اعوفه يرجع يبجي يريد يرضع وبس انطي ممه يشربها وينام كبل .. يعني مديشبع
📣🚫مو سمين مثل بنت حماتي ، مثل بنت جيران خالتي، مثل ابن الخياط الي خيط بدله العرس وغيرها من المقارنات
📣🚫من اعصر صدري مينزل حليب
⚠️الدليل الوحيد والقاطع والرئيسي والنهائي والاثبات والبينه والعلامه الداله والبرهان على أن الطفل ديشبع أو لا هو
🔹الوزن
🔹الوزن
🔹الوزن
🔹الوزن
🔹الوزن
🔹والله الوزن
🔴وزن يعني ميزاااان🔴
مو تشيلي وتكولين “احسه” صار خفيف ⛔
مو تكولين ماعنده خدود⛔
مو تكولين ضعيف⛔
مو تكولين ماعنده زنوود⛔
الوزن مال ميزززان⚖️ فقط.. وميزان مضبوط تقسي كل شهر 📅وتشوفي ضمن الجدول الطبيعي لو لا ..
اذا ضمن الطبيعي يعني ديشبع ووضعه عال العال والوضع ممتاز 👍👌وشيلي عنج الوساوس والمقارنات والاحاسيس الي حترجع بالضرر عليج وعلى طفلج 😣
وين الجداول؟ حطيتهن جوه بالصور🖼️
زين اول ايام هستوه جاي للدنيا شلون حنعرف ديشبع أو لا خوما ننتظر شهر ونشوف ؟🧐
لا طبعا حقج وهذا دليل حرص❤️ لازم عدنا علامه أخرى بهاي الأيام الحرجه حته اذا اكو خلل نلحك نتلاحك على الطفل قبل ميصير بي شي لاسمح الله
مع الملاحظه الطفل يفقد من وزنه اول اسبوع من الولاده هذا طبيعي مو يعني كاتله الجوع 😆 بعدين يرجع يزيد ويزيد بالتدريج من ثاني اسبوع.
⚠️زين شنو علامه الشبع للطفل حديث الولاده؟
🔹عدد الحفاظ المتسخ
🔹عدد الحفاظ المتسخ
🔹عدد الحفاظ المتسخ
مو كلساع يكعد بليل .. مو يبجي.. مو مدينام .. مو مجلب بصدري يعني مديكتفي كلهن مو علامات .
شكد عدد الحفاظ المتسخ؟🤔
اكو جدول جوه ارجعوا عليه وراقبوا عليه واي خلل تحسي راجعي اخصائيه رضاعة طبيعية للوقوف على الأسباب .
زين خلصنا هذا ملخص مختصر مفيد..😁❤️🌹
🌺🌸🥀🌺🌸🥀🌺🌸🥀🌺🌸🥀🌺🌸🥀🌺
الي تريد تعرف ليش مدينام وليش يبقى يرضع بالساعات وليش من تنطي الصناعي ينام وميبقى يطالب بالرضاعة تقرأ تكمله البوست :
1️⃣اولا : يبقى يبجي😭
البكاء اله الف سبب وسبب مو كل ما بجى يعني جوعان جيكي حفاظته 🚼 ملابسه غازات مغص الجو محتر بردان وغيرهن.. حاولي تهدئي شيلي حطي على كلبج يجوز كلشي مابي بس خايف ويريد يسمع گلبج💓 ..
اذا راد يرضع خير على خير بس مو شرط كثر البكاء هو الجوع..
هواي اطفال وابني من ضمنهم جان يريد يرضع ٢٤ ساعه عبالي جوعان ارضعه كلساع وطبعا ميكول لا ..بعدين كام يتقيأ لان ديرضع فوق طاقته و رضاعته مو جوع مجرد يريد يبقى بحضني أو مجرد رغبه بالمص..
زين شلون نحل الموضوع .. ؟
بسيط طولي بالج وبس محيضل العمر كله هيج فتره مؤقته بين مايتعود على العالم الجديد والبيئة الجديده المختلفه عن داخل الرحم ❤️
2️⃣ثانيا:حليبي خفيف عبالك مي💦:
هذا من اعجاز الله سبحانه في خلق الحليب الطبيعي أنه يكون على مرحلتين
الأولى : خفيفه مثل المي غنيه بالفيتامينات والمعادن المهمه وتخلي معده الطفل مهيأه لاستقبال الحليب الدسم الي حيجي بالمرحله الثانيه
الثانيه: الي يكون غني بالدهون والبروتينات الي تخلي يشبع ويزيد وزنه ..
يعني عادي تشوفي مثل المي مابي خلل هو الحليب هيج بالبدايه .. من يكمل اعصري وشوفي الفرق بالكثافه حيكون ثخين ..👍
كل الي عليج تسوي أنه تحرصين أن يوصل الطفل لنهايه الرضاعه حته يشبع ولايبقى كلساع يفز..
شلون؟ 🤔
١.🔸رضعي من الصدر الواحد اطول مده ⏰ممكنه .. الى أن تحسي فرغ يلا تحولي للصدر الثاني
٢. 🔸إذا نام 😴وبعده يدوب بادي يرضع حاولي تكعدي .. فكي كماطه اذا مكمط ..رخي الأوفر مالته العبي برجله واذنه شجعي يكمل..
٣.🔸اذا نام خلاص وميريد بعد وصدرج بعده مفرغ انتظري إلى أن يكعد ويطالب بالرضاعة ارجعي رضعي من نفس الصدر (نفس الجهه لاتغيريها) يعني رضعتين من نفس الصدر حته تضمنين وصل نهايه الرضاعه واخذ الحليب الدسم وال”ثخين”
3️⃣ثالثا: ابقى ارضعه بالساعات ومينام يريد بس يرضع ومجرد انطي صناعي🍼 كبل ينام .. يعني مديشبع مني😪
طبعا هذا الخطا للاسف كلش هواي امهات يوكعن بي ..
شوفي عزيزتي امنا الغاليه .. الطفل دينمو وكميه الحليب لازم تتغير وتزداد حته تتوالم وي حاجاته وحجم معدته الي صارت اكبر عن قبل .. هذا النمو يطلق عليه طفره النمو ..
لان هي فعلا طفره بالنمو يعني تشوفي بارحه صغيرون🐤 وثاني يوم تحسي صار اكبر و واعي اكثر !🐥
هاي الطفره حتى تتم بافضل وجه وينمو الطفل بافضل نمو يحتاج كميه حليب اضافيه.. زياده عن قبل ..
شلون حيزيد الحليب بيوم وثاني! خوما دكمه وتنداس!!😆
هاي الزياده لازم لازم لازم تتم بتحفيز الطفل المباشر (يعني الطفل يكوم يرضع كلششش هواي ) وفعلا يفرغ الثدي ويبقى يطالب يرضع ..
ويبجي فعليا مجرد توخري
لتخافين محيموت من الجوع خلال هاليومين😁 .. حياخذ كفايته بس اصبري شوي👍 ..
ابقي رضعي حتى لو تحسي فرغ استمري حيرجع يزيد الحليب وبكميات اضافيه على حسب تحفيز الطفل..
ℹ️وخلي ببالج لو اول ما ولد الطفل وكميه الحليب نفسها (غير قابله للزياده) يعني تخيلي لو كان الحليب الي بصدرج هو نفسه الي يحتاجه بعمر ٤ شهور نفسه الكميه بعمر شهر.. جان انفجر صدرج!! لان الكميه لاتتناسب وي الطلب.. معدته صغيره ميحتاج هلكد محيكدر يرضعه حيبقى بالثدي يعني حيورم عليج يعني حتشوفين عذاب فضيع .. 😖
بالمختصر رب العالمين حشاه يخلق شي عبث ..
ثقي بخلقتج وبفطرتج وبنفسج ولاتستمعين للي يثبط مدام العلامات موجوده (عدد الحفاظ .. والوزن)
وابقي رضعي شدتها يومين يلطش ٢٤ ساعه يرضع وفعليا مرات جان ابني يرضع من ١٢ بليل لحد ٥ فجر ..
تعب؟ اكيد تعب بس هذا حقهم والي ماله خلك يتعب هسه حيتعب بعدين .. أضعاف ..
زين هاي شوكت تصير هاي الطفرات ؟ اكدر اتحضر؟🤔
اي نعم تحضري ضروري فرغي نفسج وسوي جو ملائم مكان مريح 🛏️وكعده مريحه باعي فلم 📺أو اي شي يساعدج ممكن حتى تنامين وتبقين أحد يمج يراقب . وابقي رضعي وزيدي من اكل مساعدات الادرار من حلبه أو شوفان وتمر .
الطفرات تجي كمعدل (اكو فرق يجوز يوم أو يومين بس حتلاحضيهن بهاي الاعمار)
✳️بعمر ال٣ ايام
✳️بعمر الاسبوع او اليوم العاشر
✳️بعمر ٣ اسابيع
✳️بعمر ٦ اسابيع
✳️بعمر ٣ شهور
✳️بعمر ٦ شهور
✳️بعمر ٩ شهور
✳️بعمر سنه .. بعمر سنه ونصف (طفره نمو تكون حاجته للرضاعة نفسيه أكثر مما هو جوع فعلي)
أما اذا جيتي وكلتي اشو مديشبع وحطيتي ممه بحلكه بهذا التوقيت الحرج.. للاسف خربتي هواي امور عليج وعلى الطفل.. 🚫
لان توقف التحفيز!! جسمج محيعرف ابنج كبر ويريد حليب بعد!! حيبقى كميه الحليب قليله!! حتكوم متكفي !! إلى أن تصير الممه عاده ؛ ويوم وره يوم ممتين.. وراها ٣ وراها اقري السلام على الرضاعة الطبيعية😩
بالإضافة إلى أن الطفل للاسف جان باشد الحاجه لمغذيات خاصه (موجوده بحليبج فقط) حته ينمو بهاي الطفره على اتم وافضل وجه
الحل؟🤔
اصبري وابقي رضعي وحتشوفين بعينج شلون حيزيد الحليب ويرجع يستقر وضعه ويرضع ويكتفي .. فقط تاكدي أنه ديلتقم الحلمه صحيح .👍
4️⃣رابعا:ماعنده خدود.. ماعنده زنود .. مو سمين مثل ابن فلان وعلان .
ياعيوني هو خلقته هيج!! مو لان مديشبع!! عادي اكو اطفال طبيعتهم خدود واطفال لا !! خوما هو قالب كل الأطفال نفس الشي!!
حبي ابنج مثل ماهو مو مثل مايريد المجتمع أو فلانه وعلانه أو مثل متريدين .. ابنج شخص مستقل اله شكله الخاص مو شخص يلبي طلباتنا ..
ولاتقارنين🚫
لاتقارنين🚫
لاتقارنين🚫
لاتقارنين🚫
المقارنه مرض يستفحل و يدمر كل شي حلو ..
لاتقارنين .. 😙
5️⃣خامسا : من اعصر صدري مينزل حليب
لايدل على عدم الشبع ممكن هو فعلا فرغ حاليا .. حولي على الثدي الثاني وحيرجع يتكون بي حليب.. وممكن اصلا طريقه الاعتصار مالتج غير صحيحه ..
بالنتيجه هاي مو علامه.❗
الرضاعة الطبيعية مشبعه ومغذيه وتلبي كل حاجات الطفل👶 بس تحتاج جهد شوي وثقافه ومعلومات اضافيه وصبر وثقه ❤️
د.اسماء اسماعيل البدري
