الي ما مقتنعين بأنه الماء ممنوع عالرضع تحت ٦ اشهر
ضيعوا دقيقة من وقتكم واكتبوا بالكوكل ( اضرار الماء على الطفل الرضيع)
واقروا بنفسكم
اما ادناه فهاي اجابة على بعض الأسئلة
—
س / الطفل يعطش
ج/ لا ما يعطش لانه حليب امه اغلبه ماء، و الحليب الصناعي هم بيه ماء فما يعطش نهائيا
—
س / انطيناهم وما صار بيهم شي
ج/ لان الله حفظهم ، لازم يصير بيهم شي حتى متنطوهم؟
—-
س/ الماء سر الحياة وجعلنا من الماء كل شيء حي
ج/ اي اكيد وهالمي دياخذه الطفل من الحليب
احنا دنكول ميحتاج مي اضافي، مي الحليب كافي سواء الحليب الطبيعي او الصناعي
—
س/ الدكتور كاللنا انطوه مي
ج/ الحالات الفردية الي نصحكم بيها الدكتور انتو وياه تتفاهمون وتكولوله هالنصيحة خاصة بطفلنا لو كل الاطفال، اغلب هاي النصائح فردية تخص طفل كون بيه حالة معينة ما تخص كل الاطفال
—-
س/ البحوث للدول الباردة
ج/ لا . لكل الدول ومنظمة الصحة العالمية ايضا صرحت بهالشيء. ومو بحوث وبس انما طب مثبت وبالكتب متوثق
—
س/ اذا ميشرب مي يصير بيه رمل
ج/ المي هو يسببله الرمل لو باقي على حليب امه النقي الي بيه مي نقي ميصير بيه هالشي
—-
س/ قلة المي تسوي كسل بالامعاء
ج/ الي يرضع طبيعي ممكن تطلع بطنه لحد ١٠ مرات يومياً بلا ما ياخذ قطرة مي إضافي، وين الكسل بالموضوع؟
—
المي الي بالحليب كافي وشافي
مي نقي مصفى كميته مناسبة للطفل بعز الصيف والحر
الماء الإضافي هو الي ميصير ننطيه
الامهات الي يكولن في حال انطينا الطفل اكل بعمر ٤ اشهر، ننطيه مي؟
الاكل الي تنطوه بعمر ٤ اشهر هو اكل سائل بيه مي ، اكو دراسات تكول تنطوه مي بمقدار رقم الى رقمين خلال ٢٤ ساعة مو اكثر من هالشي لانه الاكل ماله كله سائل ولان بعمر ٤ اشهر حتى لو توكلوه ف انتو لازلتوا تنطوه حليب والحليب هم بيه ماء
رب العالمين الي كال وجعلنا من الماء كل شيء حيا اكد على مبدأ التوازن بحديث نبوي ثلث لطعامك وثلث لشرابك وثلث للهواء، كلشي لازم بتوازن
لمن تنطي مي اضافي راح تسبب خلل بالتوازن هذا لذلك المي الي بالحليب كافي ومناسب ومتوازن ماكو داعي للاضافي
والي بعده معاند
نسأله، طالما الماء سر الحياة، تكدر تكطع الاكل وتعيش بس عالماء؟! اكيد لا
لانه جسمك يحتاج غذاء متوازن بيه ماء وبيه اكل
والطفل دياخذه غذاءه المتوازن الي بيه غذاء وبيه ماء من حليب امه او الحليب الصناعي
—
حساب التوعية على الانستاغرام
https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال
