نرجع للاساسيات
بكل مره انزل بوست انصدم ، مو بالافكار المختلفة لا بالعكس،
وانما انصدم بأنه اساسيات التعامل ، اساسيات الاشياء
الف باء العلاقات
(غير معروفه!! وضمن طي التكهن ) 😐
يعني شنو؟ 🤔
يعني نرجع للبدايه،
المرأة شلون تتزوج؟
🔺تختار الزوج أما بالطريقه التقليدية السائده الي هي (توافق أو ترفض) الشخص الي هو يتقدم لها👍
🔺تختاره هي شخصيا بأن تدز طرف ثالث يجذب انتباهه، (بدون متنقص من كرامتها)
🔺متختاره اصلا ، ويصير الزواج من حيث لا تدري وتغلس على الموضوع سواء (موافقه ضمنيه) وتكول يلا وتقنع روحها، أو مغصوبه كليا وماعدها أي قدرة على الرفض فتمشي الموضوع لكن بداخلها رافضته تماما .. 😞
🖍️أول طريقتين الي هي ضمن موافقه المرأه أو ضمن اختيارها، غالبا يكون الزوج ضمن المعايير الي نخلي صالح للزواج وعلى قدر من المسؤولية ، وبالتالي فرص التوافق والاتفاق عاليه إلى حد ما (ولايمنع أن يطلع الزوج جدا مخيب للامال) وهذا شي أيضا موجود وبكثرة
🖍️اما ثالث طريقه الي هي تزوجه وماتعرف شي عنه، فهذا واقع حال وماله داعي ننكر ونسوي نفسنا من المدينة الفاضله،
وفرص التوافق هي (قليله أو منعدمه تماما) وممكن يصير توافق وتمشي الأمور بسلاسه،
لكن بالعموم , هنا المرأة حتعيش وي زوج هي ما اختارته ، وصار اكو اطفال،
في حال كان الزوج غير متعاون بخصوص تربيه الأطفال بشكل سليم صحيا ونفسيا وجسديا
عدها هنا مجموعة خيارات :
1️⃣تنسحب هي والأطفال وتنفصل في سبيل تحافظ على ماتبقى منهم ( وهذا قرار صعب لكن مو اصعب من أن تعيش تحت رحمة رجل لايعرف الرحمه لا بيها ولا باطفالهم)
2️⃣تحاول تغيره أو تقنعة أو تستخدم ذكاءها وحيلتها في سبيل ذلك (وهذا شي معروف على مدى التاريخ / النساء همه أساس أكبر التغيرات التاريخه على وجة الكرة الأرضية ، وماحاجه اذكر القصص والشواهد في ذلك بإمكان المهتم أن يبحث في التاريخ قليلا) وبالتالي توصل لحل يرضيها ويريحها وتكمل حياتها مرتاحه ومحققة الاشياء الي تستحقها ويستحقها اطفالها (وماكو وحده ماتكدر، لكن اكو هواي ماتعرف أو تتعاجر) وهذا يجرنا الخيار الثالث
3️⃣اوووي عليش متعبه نفسي واكعد اقنع واحجي واسولف!!! خلي ! واذا يضرب اطفالي؟؟ كل الأزواج هيج ! 😐
واذا يخلي جهالي سهرانين ع ببجي!! كل الجهال هيج! 😏
واذا يهيني ويضربني ويشتمني ويشتم اهلي وابوية وامي! عادي كل النسوان هيج!! 😑
واذا ماعندي حقوق ! ما كل النسوان عايشات بالمطبخ! 🙄
ليش دا اتعب نفسي؟ هذا نصيبي وانتهى 😔
“خليني عايشه بظلم وقهر وحرمان وذل (اني واطفالي) فهذا اسهل بهواي من أن اغير من نفسي واحاول بعدين اغير من زوجي أو أن اطلعه من حياتنا كليا” !!
الموضوع كله هو خيارات .. خياراتك انتِ ، وحياتك انتِ
◀️تردين طريق صعب وتعب ؟ بس مقابل تحصلين حقوقج ( مدام انتي اصلا بالبداية ماحالفج الحظ أن تختارين زوج كفوء) حتحصلي من تغيرين هاي الأفكار المتصدية الي تكلج عليش وعليش وماله داعي !
◀️تردين تبقين عايشه بنفس النمط ومتبذلين أي جهد ، وتبقين تعيشين دور الضحيه والمظلومه والمضطهده وبكل مكان تحجين قصه ظلمج بس في سبيل يبجون وياج وتبجين وياهم وترجعين تكملين حياتج بنفس البؤس ومتعبين نفسج ولا يوم بالبحث عن الحل وطريقه الحل، اوكي براحتج 🤷
بس تذكري، هاي خياراتج ..
قال تعالى : ( أن الله لا يغير ما بقوم حتى يغيروا ما بأنفسهم)
مكال حتى يغيروا ازواجهم 😉
التغيير يبدأ من الأفكار..
حرري افكارج..
انتي تكدرين 😉♥️
#اريد_اروح_للسوك
د.اسماء اسماعيل البدري
