#التربية
فرط التدليل
طفلك اذا صار بعمر 3 سنوات،
ويمشي ويضرب بالاطفال
ويمشي ويدفع
ويشمر ملاعيبه عليهم اكثر مما يلعب بيها وياهم
وميحترم الكبار
وماعنده أي قواعد بحياته
وعايش بعشوائيه مطلقه،
احب ابلغك، هذا الطريق حيوصله أن يكون شخص يعاني من (عقد اجتماعية)
ونقصد بالعقد الاجتماعية أن يكون شخص بالغ يكره أن يتواصل مع الناس (تواصل طبيعي) وماعنده علاقات
وعايش وحيد
وماعنده أصدقاء
ويصف كل الناس أنهم مزيفين وحقودين ، وكل الناس يكرهوه
وهذا الشي طبعا مو حقيقي! مو كل الناس مزيفين وحقودين ، اكيد اكو أصدقاء صدوقين ومن ينحطون ع الجرح ويطيب
لكن طفلك يوصل هاي المواصيل اذا اهملت واجبك تجاهه بهذا العمر بالذات
ليش هذا العمر؟
لان من يصير 4 سنوات
حيبدي يأسس علاقات اجتماعية
فاذا هو يمشي ويضرب الجهال الأصغر منه والي بعمره، ويشمر عليهم العابه،
طبعا شي اكيد محد حيقبل يلعب وياه وحينبذوه ويعوفوه ويسموه المكروه (كرد فعل طبيعي)
وهو يتصرف هيج لان مايعرف ! ومن واجب الأب/ الأم
ان يوجهوه بالتصرف الصحيح ويضبطون سلوكه بهذا العمر تحديدا
وبهذا العمر أيضا ال4 سنوات
اذا تواجد مع البالغين وكلساع يقاطع كلامهم وكلساع يطلب طلبات غير لائقه، حيقابلوه بابتسامه زائفه ويشعرون بالضيق منه، وهذا أيضا (رد فعل طبيعي)
والطفل بهذا العمر هو ذكي جدا ويكدر يستشعر هاي الابتسامة الزائفه والضيق باحساس عالي وبوضوح مطلق
وبالتالي حيكون الناس بالنسبه اله صنفين
🛑صنف مزيف ،
🛑صنف ينبذة
و يكبر مع ردود الفعل هذه ويشكل صوره عن نفسه ،
وعن الناس بشكل عام ويدخل في (عقد اجتماعية)
والسبب هو الأب/ الأم
الي يبروون سوء التصرف بعبارات
❗ يلا بعده صغير
❗ويلا يكبر ويتعلم
❗ ويلا شنو يعني يشمر ع جهال
❗ويلا شنو يعني يقاطع الأكبر منه
وغيرها من اساليب المبالغة بالتدليل أو بالحقيقة هو تملص من دور التربية
والحل طبعا، لازم توجه طفلك وتعلمه أن يحترم الكبار،
وباساليب تناسبه وتناسب شخصيتة مثلا تكله هسه عمو يحجي ومن يكمل انت تحجي ، واحد واحد، بالسره،
او تدربه بالمنزل بالدمى، بأن تخلي دمية ننكلم ثم الاخرى،
بعد أن تكمل الاولى كلامها، وغيرها من اساليب التوجيه السلوكي ..
وكذلك طرق اللعب مع الأطفال وأن يشاركهم اللعبه أن رغب ، وما تصرف بعنف ..
د . أسماء اسماعيل البدري
