عن رايي بالامومه من اكتب عنها اكول هو انت بعدك ششايفه ؟
اييي يخلص المغص و يبدي التسنين و يبدي ياكل و يبدي يمشي و تبدين تركضين وراه هو انت بعدك ششايفه !!
تتزوج البنيه و تسكن ببيت وحدها او اهل زوجها و يكولولها هو انا بعدك ششايفه !!!!
تحمل و يبدي عدها الوحام و الرد يكون هو انت بعدك ششايفه!!!
تجيب و يبدون صديقاتها يهلون عليها و تكول اني ما نايمه يكولوها هو انت بعدك ششايفه !!
قريب ترجع للدوام و هي موظفه او طالبه و عدها طفل و راسا يتلكوها هو انت بعدك ششايفه!!
بس الناس ما رايده هذا التشويق !
ما رايده تخاف من اللي جاي و اللي بعدها ما شايفته !
تريد احد يفهمها و يحجي وياها و يكوللها شنو الخطوه الجايه
كلنا ما محتاجين جمله هو انت بعدك ششايف او ششايفه
محتاجين سند و مسانده
محتاجين امل
الجمله هاي مزعجه ما تنطي امل
عن نفسي ما راح اكررها
انتبهي انت
الدور عليك
د. سيف سمير البياتي اخصائي طب الاطفال
