قبل فتره طويله
ايام كنت اداوم صباحا
طفل عنده فقر دم واصل نسبته 4
الطفل عمره ٣ سنوات و حرفيا و فعليا عايش على الحليب بالمميه
اخذ دم مع بعض الارشادات للاكل
رجع الطفل بعد شهر نسبه الدم مالته 6
فطمتي ؟ لا
دا توكلي ؟ لا
ع شنو عايش ؟ ع الحليب
الطفل وزنه زين و مدبدب بس فارغ فعليا من كل المعادن
ليش ما تفطميه؟ ما يقبل
هذه الجمله تخلي اي احد بالعالم ينتفض اذا يسمعها
اذا هو طفل و عمره سنتين و ثلاث سنوات و اربعه و خمسه ممشيك شون ما هو يريد
لعد شنو التربيه العفو؟
شنو معنى انه اكون ام او اكون اب علمود طفل صغير بكيفه يتحكم بيك انت كبالغ؟
دكتور مو يشرب بيبسي !!
ليش منينله فلوس البيبسي !
الجيل القادم من الاطفال راح يكونون غير منضبطين ابدا لان الام و الاب ما يكدرون يفطمون اطفالهم
و ما يكدرون يمنعون العصير عنهم !
د. سيف سمير البياتي اخصائي طب الاطفال
