سالت ببوست العصر كم يشترون اطفالكم يوميا من الطاقه
اللي توصلتله انه بحدود الالف دينار عند اغلب العوائل
رحت اخذت الالف دينار و تسوكت بيهن و شفت شنو اكدر اشتري
اشتريت كرواسون ب ٢٥٠ دينار و هذا بيه ٣٩٠ سعرة حراريه
و اشتريت جبس بطاطا العبوة الصغيرة ب ٢٥٠ دينار
و هذا بيه ١٤٠ سعرة حرارية
و باكيت عصير ب ٢٥٠ دينار بيه ١٠٨ سعرة حراريه
نستله صغيره ب ٢٥٠ دينار بيه ٢٠٨ سعرة حرارية
و جيت جمعت النتيجه و طلعت ؟
٨٤٦ سعرة حرارية
اشتريت بالف دينار ٨٤٦ سعرة حراريه
زين الطفل شكد يحتاج بيومه؟
الطفل حتى يعيش بعمر سنة الى 5 سنوات يحتاج من ٩٠٠ الى ١٤٠٠ سعرة حرارية !
و هنا هي الصدمه !!
يعني طفلك بالف دينار سد احتياجه الكامل للطاقه
يعني طفلك بالف و ربع دينار يزيد عن احتياجه
و النتيجه شنو؟
طفل مدبدب شاحب فاقد للشهيه ضعيف المناعه
طفل مليء خارجيا و فارغ من المعادن و الحديد و الكالسيوم داخليا
هذا اللي كاعد تسوه بالف دينار فقط
تكدرون تفحصون السعرات الحراريه من تشترون لاطفالكم من اقرب محل
اتصور هسه جواب سؤالك
ليش طفلي ما ياكل صار واضح؟
ما حسبت المشروبات الغازيه لان ما اتصور اكو ام تنطي لطفلها الاصغر من ١٨ سنة بيبسي او اي مشروب غازي اخر
دمتم بود
د. سيف سمير البياتي اخصائي طب الاطفال
