جيل هسه و جيل امس
في كل مكان و زمان لازم هذه المقارنة
امهات و اباء هذا الزمن يحسون انه فاقدين السيطره مو مثل جيل قبل جيل امهاتنا و اباؤنا
الله يحفظ الباقين
و يرحم المتوفين
كانوا بنظره يفهمونا الخطا و الصواب
بس بالوقت الحالي لا يفيد لا عتاب لا عقوبة لا ضرب و لا اي شي
كانوا يسمعون كلام
بس هسه ما يفيد اي شي وياهم
اول شي اريدك تعرفيه
انه بالبداية من كانوا يسمعون كلامنا و ينفذوه كانت عقلهم محدود و تفكيرهم صغير مثل اجسادهم ما يعرف يكول غير لا و اي
بس من كبروا
الشخصيات بدت تتكون
و الخبرات تتراكم
قدرتهم على تقييم الامور وفلترة الاوامر و تحديد الاولويات تكبر
و النتيجة راحت ذيجة البزونه اللي تكول اي و لا و صارت نمر يكدر يكول اي و لا
هذا الكلام اكيد ما عاجبنا كاهل
بس بالاخير شئنا أم أبينا هو هذا الواقع
اولادنا دا يكبرون و يتعلمون
لازم احنا نغير الصورة اللي ببالنا عنهم
مو هم يتغيرون
لازم نتقبل الوضع الجديد
لان احنا اللي قفلنا على قضيه اني امرك و انت تسمعني مو هم
فكر بالجهه الاخرى انه الطفل راح يظل يكول اي و نعم و صار لكل احد داوم وياه او عمل معاه
و النتيجه
شخص هش ضعيف الشخصيه مفتقر لثقافة الرفض
الشغلة الثانية
لازم نغير نظرتنا للامومه انه يعني اني ام اني مسيطره او اني اب اني مسيطر
اطفالنا مو شطرنج نغيرهم مثل ما رايدين
ما انكر انه التعامل بهذا المنطلق سهل
انه اني اطلب و هم ينفذون
بس صداقتهم و كسب ودهم تستحق اكثر
لازم نتقبل انه هم كبروا و صارت عدهم شخصيات مستقله و هذا راح يقلل احساسنا بالتعب من الاولاد و مسؤولياتهم و يقلل العلاقه المتوتره بيناتنا
د. سيف سمير البياتي
اخصائي طب الاطفال
