جده من جداتنا الطيبات اللي كلهم حب و حنيه
فاتت سلمت عليه و كالت اني ما عندي شي جيت حتى بس اشكرك على اللي كاعد تسويه
و احجيلك و اني اقرا بوستاتك و اكول
ايييه دكتور ذكرتني شون كنت متشوقه اعرف نفسي حامل لو
و شون ولدتهم
و شون تعبوني من تمرضوا
و شون وديتهم للطبيب
و شون راحوا للمدرسه
و شون انضرب حمودي بالطابوكه بالمدرسه و شون خيطوا راسه و شون كانوا يتعاركون و شون كنت اضوج
هم هسه اطول مني
و صاروا اباء و امهات
و مسانديني و مراعيني و الحمد لله
تكمل الجده و تكول
دكتور كلمتك مسموعه كول للاباء يحضنون جهالهم و كول للامهات لا يضربن جهالهن
تره كلها ايام و يكبرون و يبقون بس بالذكريات الحلوه
و كل الصعوبه اللي عاشوها بتربيه اولادهم راح تمر و لا كانما كانت
ودعتني الجده و وعدتها اصيغ كلماتها ببوست
و هياني اكتبلكم
انه احضنوا اطفالكم
حسسوهم بحبكم
لا تصرخين عليهم
و لا تضربيهم
كلها ايام و يكبرون و تبقى بس ذكرياتهم
دمتم بود
د. سيف سمير البياتي اخصائي طب الاطفال
