التهاب الامعاء
او نوبات الاسهال وحده
او الاسهال و القيء
دا الاحظ زياده بحالات الاسهال اللي اشوفها يوميا بحيث هي العدد الغالب من مراجعيني
خليني شويه اضوي على العلاج المنزلي
او شنو اسوي بالبيت
⭕ اهم من الاسهال و القي هو الجفاف و اهم شي انه ما يوصل الطفل لحاله الجفاف
و الحل هو السوائل
السوائل حتى ما ندوخ بيها افضل واحد بيها هو محلول الارواء الفموي و للامهات اللي جربوا قبل محلول الارواء الفموي القديم اكولهن
صار اكو محاليل ارواء فمويه جاهزه مطعمه باطعم مختلفه و اكياس مطعمه تخلي الطفل يحبها
⭕ استمري بالتغذيه
مع الاسف اشوف امهات تكول وكفت الاكل و استمريت بالحليب
في حين حتى امهاتنا يعرفن انه الرز و ماء الرز زين الاسهال
لذلك استمري بالتغذيه طبعا اذا طفلك كان ياكل اصلا
و كثري من ماء الرز و الموز و التفاح و البطاطا و التوست الابيض
و ابتعدي كل البعد عن العصير و بالاخص عصير البرتقال و الرقي و الخوخ و الحلويات لان كلشي حلو يزيد الاسهال
⭕ نقطه نظام خاصه فقط للي ينطون سفن و بدون غاز على اساس يوكف الاسهال لطفا توقفي عن فعل هذا الله يخليك لان جدا يزيد الاسهال
⭕ التقليد المتبع باعطاء الفلاجيل و اللي يسموه زورا و بهتانا قابضه
الفلاجيل مضاد حيوي و من اعراضه الجانبيه هي الاسهال
الفلاجيل لا يوصف الا في حالات الدزنتري المسؤول عنها طفيلي يسوي الخروج بيه مخاط و دم
لذلك اذا الخروج بيه دم ابدي فلاجيل
ما بيه دم سوي تحليل خروج اذا بيه طفيلي الدزنتري ابدي فلاجيل !
و هم اني ما انصح لان كاعد تنطوه بجرعه خطا
⭕ نقطه اريدكم تعرفوها بخصوص الفلاجيل من تاخذوه منو ملاحظ تغيير بطعم الفم؟
اي نعم الفلاجيل يسوي طعم مر بالفم
لذلك ارجع و اكرر لا للفلاجيل دون وصفه طبيه لان يخلي الطفل يفقد الشهيه
⭕ القيء حله صار اسهل مع شراب النوفومت العراقي
الجرعه هي من ٨ كيلو الى ١٥ كيلو 2.5 سيسي
اكثر من 15 كيلو 5 سيسي
و نذكر انه ما يعطى لاكثر من مره
و ما يعطى للقيء المزمن مثل الارتجاع
اكو ابر لنفس الماده العلميه و بالخارج اكو حبوب تذوب على لسان الطفل من نفس الماده العلميه اللي اسمها اوندانوستيرون
⭕ قطرات التقيؤ اللي اسمها مكلودين لطفا انسوها لان تسوي مشاكل بالجهاز العصبي و اختلاجات
⭕ زين دا اروح للطبيب للطبيب بالانتظار شاسوي؟
اذا مختبر قريب سوي تحليل خروج
و شون اجمع الخروج و الاسهال كانما مي
سهله لبسي الحفاظ بالعكس بحيث البطانه للخارج
⭕ الفلاجيل ننطيه فقط لحالات الدزنتري و الجايرديا
⭕ جريمه اعطاء الاطفال دون ٤ سنوات حبوب الاسهال يجب ان تتوقف و اكو يحلوها بالفلاجيل و غيرها من الخرافات
⭕ العلاج بالبكتريا النافعه قسم يشوفوه مفيد و قسم يشوفوه مو كلش فعال
اني جدا اشوفه مفيد و تكدرون تستخدموه بعد الاستفسار من الصيدلي
⭕ لا تظل تكرر بمضاد القيء اكثر من مره دون استشاره طبيب لان ممكن يكون انسداد امعاء
⭕ خوافض الحراره طبعا الامين بيهم الباريستول بمختلف اسماؤه التجاريه
⭕ ادويه المغص ما افضلها لان تسوي جفاف بفم الطفل و لا اتذكر كاتبها في يوم
المغص كافي عليه الباريستول
د. سيف سمير البياتي اخصائي طب الاطفال
