#اول_تصرف_اول_رد_فعل
اول مرة يتصرف الطفل تصرف معين انتبة كلش زين لرد الفعل
📍اذا ضحكت وقهقهت ونشرت الخبر بين الجيران والاحباب والتجمعات وكدام الطفل, هنا انت رسخت التصرف وطبعته براسة تماما
📍اذا غلست تماما، حيبدي يتلاشى التصرف تدريجيا
📍اذا انفعلت وصيحت ، والاسوا ضربت
رح يرجع يسوي هذا التصرف مرارا وتكرارا كلما جانت عنده رغبه ب
🔸استفزازك
🔸جذب انتباهك
🔸الانتقام
🖊️وطبعا هاي مرحلة جدا خطره خصوصا فترات المراهقة
🖋️نسمع الام والاب يشكي ويندب حضه ان ابنه يسوي تماما كل الاشياء الي هو مانعه عنها (منع عنيف)
وكانما يتشفى بيهم
(وفعلا هذا الشي يصير عند المراهق الي ما عاش طفولتة بشكل صحيح )
🌼لذلك دائما اذكر وانبه، التربية هي زرع يطلع ثماره بعد سنوااااات
مو بنفس اليوم ابدا 🌼
🛑يجوز هسه طفلك يستجاب للصراخ والتهديد، لكن من يكبر ويتقوى، ينتهي هذا المفعول ويبدي مرحلة الانتقام او يحاول يرجع قيمته لنفسه من خلال سلك الطريق الاصعب (التمرد)
🛑او ينكسر خلاص ، ويصير ضعيف شخصية ، والف واحد يتحكم بي واكيد الاقوى هو المنتصر، فبالتالي يصير فريسه لكل المنتمرين ورفقاء السوء الي يجبروه او يوهموه بان يسوي الاشياء الغلط وهو حينطيهم التسليم المطلق بالتلاعب بي
📔نجي للامثلة على ارض الواقع :
📍ابنك ذو ال3 سنوات ، نزع ملابسه كدام الخطار
اذا ضحكت وقهقهت وهاي شنو ويا و ههههه وهههههه وتعال فلان شوف وههههههه
وترجعين تحجين الموقف لكل الاقارب والاصدقاء
هاي بعد حيفضحج فضيحه بكل مكان يرجع يسوي هالتصرف او يستفزج بي
📍مثال اخر
طفلك ابو السنتين ونصف بصق/ تفل على اخوه الاخبر منه
وكذلك العيلة كلها كامت تضحك ويا وهاي شنو كمت تتفل وهههههه وههههه
هم ترقب عهدا طويلا من ال(تفال)
📍طفلك ابو 4 سنوات
وامه دتحجي وياه وكلها د كافي سكتي مو دوختيني
والاب والجد والبقية كلهم ضحكوا وصاحوا العم والخال وكالوا له تعال اسمع شلون صاير يسولف
◀️هذا الشي لايعني انه تكلبها كلها نكد والوجه علطول معبس وماكو تفاعل ، بالعكس
الاشياء الحلوة الي يسويها طفلك اضحك عليها وشجعه واحجي بيها للرايح والجاي، هيج رح ترسخها بي وتخلي يسويها علطول
🔸مثل من يحضن اخته الصغيرة
🔸من يكول لماما (اساعدج)
🔸من برتب العابة
وغيرها وغيرها من التصرفات الحلوة
🔆الي خلاني اكتب هذا البوست قبل كم شهر، جنت ببيت اهلي، وجانوا ديسولفون وياه ومن ضمن السوالف سئلوه ماما شنو اسمها؟
ومجانوا متوقعين هو يعرف او اقلها ممتوقعين حيعرف يعبر
لكن هو صفن شوي وكال (اسماء)
العيلة كلها خربت ضحك وصفكوله وكلوله اي صحيح عفية الذكي
جان موقف مبهج جدا بالنسبة اله
ورجعت اني حجيت الموقف كدام ابوه،
بوجوده
الي صار بعد كم شهر ، والي هو حاليا،، بطل يصيحني ماما
وكله يكلي اسماء 🤣💔
د.اسماء اسماعيل البدري